Artıq altı aydır ki həbsdə qalan Dövlət Bayrağı Meydanı Kompleksi İdarəsinin keçmiş rəisi, “Azİmport” şirkətinin sahibi Rəşad Məmmədovun işi yenidən mətbuatın gündəmindədir.

Mediatv.az xəbər verir ki, R.Məmmədovla birgə həbs olunan İsfəndiyar İsfəndiyarovun vəkili dünən “Qafqazinfo”ya müraciət edərək bu işdə zərərçəkən kimi tanınan Zabil Salmanovun ərizəsini təqdim edib. Həmin ərizədə Səbail rayonu Nizami küçəsi 44 ünvanında yerləşən ona məxsus qeyri-yaşayış sahəsinin mülkiyyət hüquqlarını Rəşad Məmmədov, İsfəndiyar İsfəndiyarov və Arzu Məmmədova satdığı və qarşılığında 4 milyon 700 min manat aldığı, eyni zamanda heç bir tələbinin olmadığı əks olunub.

Maraqlısı isə odur ki, məhz şikayətçi Zabil Salmanovun mayın 12-də yazdığı ərizəsindən sonra hər üç şəxs barəsində dələduzluq maddəsi ilə cinayət işi açılıb. Salmanov şikayətində həmin qeyri-yaşayış sahəsi üçün ona tələb olunan məbləğin ödənilmədiyini bildirib.

“Qafqazinfo” əməkdaşları bayraq Meydanı rəisinin istefasına və həbsinə səbəb olan həmin Nizami küçəsi 44 ünvanında olublar və qalmaqallı obyektin fotolarını çəkiblər.

Qeyd edək ki, bir neçə ay əvvəl vəzifəsindən azad olunaraq həbs edilən Rəşad Məmmədov Bakının ən tanınmış rerstoranlarının sahibi kimi də məşhur olub. Onun sahib olduğu obyektlər arasında “Nar Şərab”, “Manqal”, “Venesiya”, “Dağüstü park”, “Senator” və Bayraq meydanındakı “Bayraq” restoranı da var. Həmin restoranlar isə paytaxtın ən bahalı məkanları hesab olunur.