Qaynarinfo-nun əldə etdiyi məlumata görə, Nahid Rüstəmov işdən çıxarılmasını məhkəmədə mübahisələndirib. O, işə bərpa və işsiz qaldığı müddət üçün əmək haqqının ödənilməsi tələbi ilə Yasamal Rayon Məhkəməsində iddia qaldırıb. 

Lakin hakim Fariz Əlizadə Nihad Rüstəmovun iddiasını təmin etməyib. O, iddia müddətinin ötürüldüyünü əsas gətirib. Yeri gəlmişkən, Fariz Əlizadə hakim olmazdan əvvəl DSMF-nin Maliyyə-Mühasibatlıq üzrə Mərkəzi Filialında hüquqşünas kimi fəaliyyət göstərib.

Nihad Rüstəmov birinci instansiya məhkəməsinin qərarından apellyasiya şikayəti verib. Lakin Bakı Apellyasiya Məhkəməsi Fariz Əlizadənin qərarını qüvvədə saxlayıb. 

Keçmiş şöbə müdiri hüquqi mübarizəsini davam etdirərək Ali Məhkəməyə kassasiya şikayəti təqdim edib. Ali Məhkəmə işi yenidən baxılması üçün Bakı Apellyasiya Məhkəməsinə göndərib. Bu dəfə Bakı Apellyasiya Məhkəməsi Nihad Rüstəmovun iddiasını təmin edib. 

Qarşı tərəf Ali Məhkəməyə kassasiya şikayəti təqdim etsə də, rüsumun məbləğində yanlışlıq edib. Bu baxımdan, şikayət geri qaytarılıb. Bakı Apellyasiya Məhkəməsi isə yenidən işə baxaraq qərardan kassasiya şikayəti verilməsinin mümkünsüz olması barədə qərardad çıxarıb. 

Qaynarinfo bu məlumatlarla əlaqədar Nihad Rüstəmovun özü ilə əlaqə saxlayıb. O, məhkəmə yolu ilə işə bərpa olunduğunu təsdiqləyib. 

"Haqlı mübarizəmi daim nəzarətində saxladığına görə Ali Məhkəmənin Mülki Kollegiyasının sədri hörmətli Sənan Hacıyevə, Ali Məhkəmənin hakimləri İspəndiyar Şəfiyev, Əhməd Nurməmmədova, Bakı Apellyasiya Məhkəməsinin hakimi Zabit Bəhmənzadəyə və vəkil Tural Şahbazova minnəttarlığımı bildirirəm", deyə şöbə müdiri bildirib.