O, SOCAR rəhbərliyinə xitabən müraciətini belə davam etdirir: "Ay Rövşən müəllim, sizin əliniz ümumiyyətlə, nə vaxt neftə dəyib? Siz uzağı SOCAR Tower-in 2-ci mərtəbəsində, bankanın içində nefti görmüsünüz. SOCAR Downstream-i də veribsiniz türkiyəlilərin əlinə, hansı ki, orada işləyən azərbaycanlı mühəndislər onlardan 4-5 dəfə az maaş alır!

Bu ölkənin neft tarixi var. Bizim Yusif Məmmədov, Fərman Salmanov, Xoşbəxt müəllim kimi dünya səviyyəsində söz sahibimiz olan neft mütəxəssislərimiz olub. Siz isə ölkənin neft sektorunda mühəndis savadı olan adamı kənara atıb, onun yerinə maliyyəçi götürürsünüz. Bu necə məntiqdir?

Mən 42 yaşındayam, məni heç kim ixtisar etmədi. 20 il ömrümü SOCAR-ın baş ofisinə qoydum. Amma haqqsızlıqlara ürəyim dözmədi və ərizəmi yazdım – 26 dekabrda müqaviləmə xitam veriləcək. Sizin və sizin yanınızda oturan “ixtisasız kadrların” SOCAR-da uzun illər çalışan mütəxəssisləri belə vəziyyətə salmağınız məni həm mənəvi, həm psixoloji cəhətdən sarsıtdı.

İşə qəbul etdiyiniz insanların 50 faizi günün yarısını birinci mərtəbədə "Costa Coffee"də söhbət edib vaxt öldürməklə keçirir. Bir vitse-prezident üçün beş müşavir, dörd müavin təyin edirsiniz. İşə qəbul prinsipi isə bundan ibarətdir: “İngilis dilin var?” – “Var.” “Xaricdə təhsil almısan?” – “Almışam.” “Onda təbriklər, SOCAR-ın baş ofisinə qəbul olundun.” Yaxud da kiminsə qohumu olub gəlirlər, vəzifəyə otururlar.

Bu sistem nə mütəxəssis yetişdirir, nə inkişaf etdirir – sadəcə olaraq ölkənin neft sektorunu içindən boşaldır. Nə isə... deyiləsi dərd deyil..."