Mediatv.az-ın məlumatına görə, Virtualaz.org saytı hadisə şahidlərinə istinadən xəbər verir ki, sürücülərdən biri nəqliyyat müfəttişlərinə pul verməkdən imtina edib.

Sürücü bunu müfəttişlərin onu saxlamağa səlahiyyətinin olmaması ilə əsaslandırıb. Əlavə edib ki, son dəyişiklikdən xəbəri var və onu yalnız yol polisi əməkdaşları saxlaya bilər.

Bunun cavabında nəqliyyat müfəttişləri sürücüdən kobud şəkildə “ağzını yummağı” və pul verməyi tələb ediblər. Lakin sürücü inad göstərib və Nəqliyyat Nazirliyinin reketlərinə pul verməyib.

Xatırladaq ki, prezident İlham Əliyevin 14 oktyabr, 2015-ci il tarixli fərmanı ilə Nəqliyyat Nazirliyinin səlahiyyətlərinin bir hissəsi (məsələn, yük və taksi maşınlarının yoxlanması, onların lisenziyasının olub-olmaması və s.) ondan alınaraq Dövlət Yol Polisinə verilib.