68 saylı Cəlilabad kənd seçki dairəsindən seçilmiş millət vəkili Elman Nəsirov rayonun Adnalı kəndində şəhidlərin xatirəsinə ucaldılmış bulağın açılış mərasimində iştrak etmişdir. Tədbirdə Cəlilabad rayon İcra Hakimiyyətinin rəsmiləri, Gənclər və İdman İdarəsinin rəisi, Gənc qazilər ictimai birliyinin rayon filialının sədri,şəhid valideyinləri və kənd ağsaqqalları iştirak etmişdir. Açılışa başlamazdan əvvəl şəhidlərimizin xatirəsi bir dəqiqəlik sükutla yad edildi. Deputat Elman Nəsirov Prezident İlham Əliyevin şəhid ailələri, qazilər, və müharibə  veteranlarına göstərdiyi böyük diqqət və qayğısını tədbir iştirakçılarının nəzərinə çatdırdı. Millət vəkili avqust ayının 26-da  Laçın şəhəri, Zabux və Sus kəndlərində Azərbaycan Bayrağının qaldırıldığını diqqət mərkəzinə gətirərək bildirdi ki, çox zaman keçməz Xankəndi də, Xocalı da və digər yaşayış məntəqələri də tam şəkildə Azərbaycanın yurisdiksiyası altına keçər. Millət vəkili eyni zamanda vurğuladı ki, ölkəmizdə şəhid ailələrinə 13000-ə yaxın mənzil və evlər verilib, qazilərimiz 7500-dən çox avtomobillə təmin ediliblər. Bakı və Sumqayıt şəhərində, Abşeron rayonunda 2022-ci il bir nəfər də olsun şəhid ailəsi evsiz, mənzilsiz qalmayacaq, həmçinin bu proses digər rayonlarda da uğurla həyata keçirilməkdədir. Sonda isə Adnalı kənd şəhid məzarları ziyarət edildi, onların üzərinə gül dəstələri qoyuldu.