Rayon rəhbərliyi kənd və şəhər bələdiyyəsi sədrləri üçün qiymət müəyyənləşdirib

Dekabrın 23-də keçiriləcək bələdiyyə seçkiləri daha çox yadda bazar prinsipləri ilə keçirilən seçki olara qala bilər. Buna səbəb rayon rəhbərlərinin heç bir funksiyası olmayan, yalnız torpaq satmaqla məşğul olan bələdiyyə yerlərini satışa çıxarmasıdır. 

Sayta verilən məlumata görə, Zərdab rayonunda da bələdiyyə seçkilərini “xüsusi” hazırlıq gedir. Belə ki, rayonda postlar hərraca çıxarılıb. Və kənd bələdiyyələrinin sədri olmaq üçün 3000-5000 manat tələb olunur. Onların müavinləri üçün müəyyən edilmiş qiymət isə 500-1500 manat aralığında dəyişir. Hətta bu bələdiyyələrdə mühasib olmaq istəyənlər üçün də qiymət təyin edilib: 300-500 manat. 

Məlumatda iddia edilir ki, yerli İcra Hakimiyyətinin müəyyənləşdirdiyi qiymətlər bununla yekunlaşmır. Əsas ağırlıq isə Zərdab şəhər bələdiyyəsinin üzərinə düşüb. Daxil olan məlumata görə, birbaşa icra başçısı Lütfəli Babayevin nəzarətində olan bu posta təyinat xeyli bahadır. İddia edilir ki, şəhər bələdiyyəsinin sədri olmaq üçün 30 min manat istənilir. Üstəlik, o da deyilir ki, Zərdab şəhər bələdiyyəsinin sədri Babayev familiyalı bir nəfər olacaq. O isə həmin pulu evini banka girov qoyaraq götürüb və lazım olan adamlara verib. 

Qarşı tərəfi də dinləməyə hazırıq.