Qum kimi parlaq dənəciklər Yeni il bayramı ərəfəsində ənənəvi olaraqpopulyarlıq qazanır, lakin zərlər bu il xüsusilə aktual olub.

Mediatv.az xəbər verir ki, zərlər bu il saçlarda əks olunub. Yeni ilin simvolu sayılan rəngbərəng zərlər Yeni il gecəsində saçları bəzəyəcək.

Maraqlıdır ki, bu trendlə kişilər də ayaqlaşa biləcək. Belə ki, qızlar saçlarını, kişilər isə saqqalını zər tozları ilə bəzəyəcək. Qeyd edək ki, hər iki halda qum kimi parlaq dənəciklər rəngli və hörüklü saçlarda daha effektli görünür.

Bu trendə əməl etmək çətin deyil. Bunun üçün sadəcə olaraq, saçınızın ayırdığınız hissəsinə zər töküb üstündən saç lakı vurmaq lazımdır. Mütəxəssislər zərləri saç gelinə də əlavə etməyi, daha sonra fırça ilə daramağı məsləhət görür.

Lakin bütün bu gözəlliyi yumaq elə də asan deyil. Kiçik zər dənəciklərini saçdan birdəfəlik yumaq mümkün olmaya bilər. Onları saçdan qoparmaq yaxşı fikir deyil. Çünki saçlarınız zədələnə bilər. Zərlərin təmiz yuyulması üçün saça əvvəlcə yumşaldıcı krem və ya təbii bitki yağları çəkmək, sonra isə şampunla yumaq məsləhət görülür.