Əmlak Məsələləri Dövlət Komitəsinin sədri Kərəm Həsənov tərəfindən bu gün Sabirabad rayonunda vətəndaş qəbulu keçirilib.

Mediatv.az xəbər verir ki, Qəbul zamanı Sabirabad, Şirvan, Hacıqabul, Salyan, Neftçala və Saatlı rayonlarından olan vətəndaşların müraciətlərinə baxılıb.

İştirak edən vətəndaşların bir qismi dövlət əmlakının özəlləşdirilməsi prosedurları, dövlət mülkiyyətində olan əmlakların icarəsi barədə müraciətlərini səsləndiriblər. Dövlət əmlakının satışı üzrə keçirilən hərraclarda iştirak, onların icarəsində və ya istifadəsində olan kiçik dövlət obyektlərinin özəlləşdirilməsi şərtləri barədə müraciətlər çatdırılıb.

Komitə sədri həm Bakı, həm regionlarda yerləşən səhmdar cəmiyyətləri, kiçik dövlət müəssisələri və qeyri-yaşayış sahələrinin özəlləşdirilməsi üzrə hər həftə açıq hərracların keçirildiyini bildirib. 

Sədr qəbulda vətəndaşların onlara məxsus mülkiyyətin dövlət qeydiyyatına alınması ilə bağlı müraciətlərini də dinləyib. O, torpaqların təyinatı ilə bağlı tələblərə riayət olunmasının vacibliyi, əks halda qanunvericiliklə müvafiq cəzaların və cərimələrin nəzərdə tutulduğunu diqqətə çatdırıb. 

Qəbulda bir sıra müraciətlərin həlli məqsədilə Kərəm Həsənov tapşırıqlarını verib.