"İran son 30 ildə Avropa və ABŞ-da 1 milyondan çox tələbə oxudub. Yaxın 10 ildə İran regionun və dünyanın ən intensiv inkişaf edən ölkəsi olacaq ".

Mediatv.az xəbər verir ki, bu sözləri iqtisadçı ekspert Natiq Cəfərli deyib.

Ekspert bildirib ki, İran dövlət televiziyası ABŞ prezidentliyinə namizədlərin tele-debatını fars dilinə sinxron tərcümə ilə efirə verib:"Sonra da İran siyasətçiləri səslənən tezisləri canlı yayımda müzakirə ediblər.İran iqtisadiyyatına yaxın 3 ildə 200 mlrd. dollara yaxın investisiya qoyulacaq, dünyanın bütün iri şirkətləri 80 milyonluq İran bazarından pay qoparmağa çalışırlar.İran əhalisinin 70%-ə yaxını 35 yaşa qədər olan gənclərdir". 

Natiq Cəfərli qeyd edib ki, İranın idarəetmə sisteminin eybcərlikləri getdikcə azalır: "İran son 30 ildə Avropa və ABŞ-da 1 milyondan çox tələbə oxudub. Yaxın 10 ildə İran regionun və dünyanın ən intensiv inkişaf edən ölkəsi olacaq, getdikcə açılacaq, açıldıqca daha çox dünyəviləşəcək. İranın müasirləşməsi və dünyəviləşməsi bizə çox lazımdır, amma acınacaqlı budur ki, onlar çağdaşlaşdıqca, biz qaranlığa doğru gedirik. İranın iqtisadi inkişafında Qərb şirkətləri üçün biz start nöqtəsi, baza ola bilərdik, amma bacarmadıq. Ciddi imkan əldən çıxdı, bir müddət sonra bizim vətəndaşlarımız işçi qüvvəsi kimi Rusiyaya yox, İrana gedəcək. Yeri gəlmişkən, iş adamlarımızın imkanı varsa, indidən İran bazarında yer tutmağa çalışsınlar, qazanclı çıxacaqlar"...