“Azərbaycanda 6 min nəfərə yaxın məhkum işlə təmin olunub. Bu, ümumi götürdükdə məhkumların dörddə biri deməkdir”.

Mediatv.az-ın məlumatına görə, bunu Ədliyyə Nazirliyi Penitensiar Xidmətinin rəisi vəzifəsini icra edən, ədliyyə general-mayoru Hüseyn Əlixanov deyib.

H. Əlixonov bildirib ki, cəzaçəkmə müəssisələrində cəza çəkən məhkumların hüquqları qorunur və təhlükəsizlikləri də təmin olunur. Onun sözlərinə görə, məhkumlar asudə vaxtının daha səmərəli keçməsi üçün əmək fəaliyyətinə cəlb olunurlar: “Amma məhkumların əmək fəaliyyəti ilə məşğul olmasını təmin etmək təkcə Penitensiar Xidmətin işi deyil. Çünki bu məsələdə cəmiyyət, qanunverici orqanlar, qeyri-hökumət təşkilatları, dövlət orqanları yaxından iştirak etməlidirlər. Bu məsələnin həllində hər kəs maraqlı olmalıdır. Məhkumlar arasında çox istedadlıları olduğundan biz çalışırıq ki, onların əmək fəaliyyətinə cəlb olunması daha çox diqqətdə olsun. Cəzaçəkmə müəssisələrində məhkumlarda maraqlıdırlar ki, onların boş vaxtı az olsun. Bu onların özü üçün də böyük stimuldur. Çünki məhkumların əl işləri satışa çıxarılır, onlar da əldə etdikləri məvaciblə ailələrinə maddi yardım göstərə bilirlər”.

APA