“Azərfon” MMC (Nar mobile) tərəfindən dekabrın 1-dən başlanan işçi ixtisarları barədə mühüm məlumatlar yayılmaqdadır. Həmin məlumatlarda qeyd olunur ki, işçilərin ixtisarı zamanı kobud qanun pozuntularına yol verilib, Əmək Məcəlləsi ilə müəyyənlişmiş qaydalar pozulub, işçilərin nə təhsilinə, nə iş stajına, nə də ailə vəziyyətinə məhəl qoyulmayıb.

 Mediatv.az xəbər verir ki, Cumhuriyyet.az-ın redaksiyasına bununla bağlı daxil olan məktub həm də ölkə rəhbərinə, hüquq-mühafizə orqanlarına ünvanlanıb.  Məktubda bildirilir ki, tənha analar, ailəsinin tək işləyən işçiləri ixtisar edilmiş, bir ailədən və yaxın qohumlardan ibarət olanlar isə işlə təmin edilmişdir.  Məktubda göstərilənlərin bir hissəsini olduğu kimi diqqətinizə çatdırırıq: "İşdə qalanların bir çoxu tanışlıqla, bir çoxu isə kadrlar idarəsinin rəisi Mətanət Babayevaya rüşvət veriblər. Azərbaycan Prezidentinin cəmiyyətimizdə sosial ədalət prinsiplərinin bərpa olunması çağırışlarına zidd olaraq idarədə sosial ədalətsizlik hökm sürür. Sıravi işçilərdən dəfələrlə çox maaş alan idarə, şöbə rəislərindən bir nəfər də ixtisar edilməyib. Şirkətdə 30-40 min manat maaş alan əcnəbilərdən biri ixtisar edilsə idi və ya maaşları qismən azaldılmış olsaydı, öz vətəndaşlarımız işsiz qalmazdı. Onlardan da çox maaş alan əcnəbilər isə sanki “toxunulmazlıq statusu” alıb. Bakının ən bahalı otel və mərkəzindəki evlərində yaşayır, pulunu şirkətə ödətdirir, övladlarının da adını şirkətə yazdırıb onlara şirkətdən maaş verirlər. “Sapı özümüzdən olan” hər gün kafe, restoran gecə barlarında kef məclisləri təşkil edib dəbdəbəli həyat sürən Mətanət Babayeva, Könül Kərimova, Emil Məsimov kimilər də əcnəbilərin qanunsuz əməllərinə hüquqi don geyindirmək üçün dəridən-qabıqdan çıxırlar”.

Məktub müəllifləri xarici ölkə vətəndaşlarından ibarət olan şirkət rəhbərliyinin dövlətçiliyimizə qarşı əməlləri, korrupsiya faktları, milli-mənəvi dəyərlərimizə zidd hərəkətləri barədə də əldə etdikləri məlumatları açıqlayaraq müvafiq qurumlardan faktları yoxlayıb, tədbir görülməsini xahiş edir: “Baş direktor Kent Maknili Azerfon şirkətinin hesabından özünün məsəhətçi kimi işlədiyi firmalara pullar köçürür. Şirkətin direktoru kimi aldığı maaşdan əlavə şirkətin məsləhət verəni kimi də şirkətdən özünə pullar ödəyir. Öz ölkələrinə ildə 2 dəfə gedib-gəlmə pullarını şirkət ödəyir. Qalan hallarda isə həmin pulu özləri ödəməlidirlər. Bunun üçün saxtakarlıq edib özlərinə ezamiyyə yazdırıb pulunu şirkətə ödətdirirlər.
Azərbaycanda yüzlərlə reklam şirtkətləri və savadlı kadrların işlədiyi firmalar olarkən Kent Maknili və Maks Fyodorov Azerfon şirkətinin vəsaitini dolayısı ilə xaricdə özünə, yaxınlarına məxsus və dəfələrlə baha olan şirkətlərə axıdır. Rabitə Nazirliyi ilə əlaqəli bütün korrupsiya faktlarına sübut Kent Maknilinin Könül ilə yazışmalarıdır.
Şirkəti idarə edən bu xarici vətəndaşlar bizim ölkədə işləyib 30-40 min manat maaş almaqları azmış kimi ayda 500-1000 manat maaş alan millətimizin nümayəndələrini işsiz qoyurlar. Bundan əlavə, şirkətdə paya sahib olan milliyətcə yunan Yorqosun “sayəsi”ndə Ermənistanın ZET, Arto Lebedev şirkətləri ilə gizli əlaqələri olub, həmin şirkətlərə pullar ötürülüb. Türk şirkətləri ilə əlaqələrə imkan verməyən Yorgos özündən sonrakı işçini də yunan millətindən təyin edib”.
Məktubda bildirilir ki, Keçmiş MTN şefi Eldar Mahmudovun dövründə özünü onun qohumu kimi qələmə verən şirkətin hüquqşünası Emil Məsimov şirkət işçilərinin danışıqlarını, yazışmalarını gizli izləyərək şirkətin qadınlarına, qızlarına qarşı şantaj vasitəsi olaraq tətbiq edib. Bundan başqa, məktubda şirkətdaxili münasibətlər haqda ilginc məlumatlar yer alıb. Biz bu məlumatların şəxsi həyatla bağlı olduğunu nəzərə alaraq onlar üzərində dəqiqləşdirmə apardıqdan sonra dərc edəcəyik.

• Şirkətin baş direktoru Kent Maknilin maliyyəçi xanımla macərası;
• Telefonla yazılan SMS-lər və otel qarşısındakı döyülmə olayı;
• Könül Kərimova doğrudanmı sabiq nazir Əli Abbasovun “adamı” olub?
• Marketinq direktoru Maks Fyodorovun vətəndaş nikahı…
• Kent Maknilinin doğma qızının adının şirkətə yazdırılması və  ona uzun müddət işçi və şirkətin məsləhətçisi kimi ödənilən pullar…

Bütün bunlar haqda növbəti yazımızda. Bizi izləyin…

P.S. Yazıda göstərilən  məlumatlarla bağlı şirkətin rəsmi mövqeyini və adları çıkilən şəxslərin mövqeyini dərc etməyə hazırıq.