Culfa Rayon İcra Hakimiyyətinin inzibati binası və rayonun İnzibati Ərazi Dairəsi üzrə nümayəndəliklərinin inzibati binalarında mövcud qazanxana sistemləri yeni kombi qurğuları ilə əvəz olunacaq.

32gun.az xəbər verir ki, bu məqsədlə layihənin həyata keçirilməsi üçün ehtimal olunan qiymət 195.988,35 manat olaraq müəyyən edilib.

Layihənin məqsədi binalarda istilik sistemlərinin müasirləşdirilməsi, enerji sərfiyyatının azaldılması və daha səmərəli istilik təminatının yaradılmasıdır. Yeni kombi sistemləri həm istilik, həm də isti su təchizatı baxımından daha effektiv və qənaətcil hesab olunur.

Qeyd edək ki, Culfa Azərbaycanın icra başçısız ən uzun müddətə qalan rayonu olaraq diqqət çəkir. Prezident İlham Əliyevin 31 avqust 2023-cü il tarixli sərəncamı ilə Culfa Rayon İcra Hakimiyyətinin başçısı Siyam Hacıyev vəzifəsindən azad edilmişdi. Hacıyev bu vəzifədə 2019-cu ilin aprel ayının 2-dən çalışırdı.

Hazırda Culfa Rayon İcra Hakimiyyətinə rəhbərlik müvəqqəti olaraq başçının müavini Sara Hüseynovaya həvalə olunub.