Sabunçu rayonu, Ramana qəsəbəsi, 14-cü mədən, ev 33-də yaşayan Qəhrəmanov Sakit Manaf oğlu tətəfindən Hurriyyet.az saytının redaksiyasına şikayət məktubu daxil olub. O, saytımız vasitəsilə Prezident İlham Əliyevə və Baş prokuror Kamran Əliyevə müraciət edir:
"Cənab Prezident!
Hörmətli Baş prokuror!
Mən, Qəhrəmanov Sakit Manaf oğlu, yazaraq Sizlərdən xahiş edirəm ki, problemimlə bağlı tapşırıq verəsiniz.
Bildirim ki, Səfərov Rafail İbadulla oğlu mənə qarşı külli-miqdarda dələduzluq etmişdir. Həmin şəxs məni aldadaraq, 3 milyon manatlıq obyektimi öz adına keçirmişdi. Həmin obyektin yerini vaxtılə Rza adlı şəxsdən almışdım. Obyekt özəlləşdirilməmişdi.
Bir gün Rza mənə zəng vurub dedi ki, Rafael adlı şəxs var, o, "obyekti özəlləşdirməyə adamım var" deyir. Mən də razılıq verdim ki, lap yaxşı, özəlləşdirsin. Amma Rafael əvvəlcədən pul istəmişdi, onu verə bilmədim. Razılaşdıq ki, obyekti onun adına keçirdək. Sənədi əlinə alan kimi, Rafael saxtakarlıqla kupça alıb və obyekti satıb. Bu işdə ona kömək edən şəxslər isə bunlardır: Əhmədov Rza Əli oğlu, Nəcəfov Adil Rəsul oğlu və Əliyev Cəbrayıl Allahverdi oğlu. Bu şəxslər 2015–2017-ci illər tarixdə dələduzluq yolu ilə saxtakarlıq edərək əmlakımı öz adına keçirib, sataraq pulumu mənimsəyiblər.
Məsələ ilə bağlı 7-8 ildir Sizə və respublikanın bütün hüquq-mühafizə orqanlarına yüzlərlə şikayət ərizələri yazıram, neçə illərdir Bakı Şəhər Prokurorluğuna, Respublika Prokurorluğuna gedib-gəlirəm, amma faydası yoxdur. Əmlakımı saxtakarlıqla, dələduzluqla ələ keçirən Rafael azadlıqda gəzir.
Rafael adlı şəxs və ətrafı məni çox hörmətli Bəylər Həsən oğlu Eyyubovun adından hədələyirlər. Rafael deyir ki, "Bəylər müəllimin özü və qardaşı oğlu Həsən mənim arxamdadır". Əlbəttə, belə cəfəngiyyata inanan ancaq onlar kimi dələduzlar ola bilər. Çünki cənab Prezidentin şəxsi mühafizə xidmətinin rəhbəri heç vaxt dələduzları himayə edə bilməz.
Amma onu da deyim ki, rəsmi qurumları da bu yolla təhdid etdiyi üçün Rafaeli tutmurlar. Əlimdə bütün dediklərimə dair Rafaelin səs yazıları və danışıqları var. Adını çəkdiyi o adamlardan narhat olduğum üçün bu səs yazılarını başqa adamlara da ötürmüşəm. Telefon vasitəsilə pulumu istəyərkən, əsəbləşib ağzıma gələni demişdim. Bu adam da, özünün dediyinə görə, Baş Mütəşəkkil Cinayətkarlıqla Mübarizə İdarəsinə "hörmət" etdiyi üçün həmin günü 10 nəfər üzübağlı polis nümayəndələri gəlib məni apardılar, 1 gün içəridə saxladılar. Daha sonra Rafael gəldi, mən yenə sözümün üstündə duraraq pulumu tələb etdim. Polis əməkdaşları da Rafailə dedilər ki, adamın pulunu ver. O isə, "yaxşı, 40 min verim, qalanını da sonra verəcəyəm" dedi. Ordan çıxanda isə mənə bildirdi ki, "gördün də, səni kimlərə götüzdürdüm". İdarədə söz verdiyi 40 min manatı isə vermədi.
Prokurorluq orqanlarının əməkdaşları pulumu ələ keçirən dələduz dəstənin başçısı Səfərov Rafail İbadulla oğlunun cinayət əməli barəsində tədbir görə bilmirlər. Səfərov Rafail mənim əmlakımı satıb, pulumu ələ keçirəndən sonra respublikada özünə xeyli yerdə, xeyli sayda külli miqdarda dəyərləri olan əmlaklar almışdır.
Rafailin adını ərizəmdə yazıb göstərdiyim hörmətli Bəylər müəllimin qohumları müdafiə etdikləri üçün polis-prokurorluq orqanlarının heç bir işçisi şikayət ərizələrimi araşdırıb, Rafaildən sorğu tələb etmir. Əmlakı əlindən gedən mən, şikayətçi yenə mən, amma Rafaelin sözü ilə “Bandotdel” məni 1 günlük də olsa həbs edir. Haqlı olduğum halda isə mən heç nə edə bilmirəm.
Hörmətli Kamran Əliyev!
Bu günə qədər nə qədər çalışsam da, məni Sizin qəbulunuza yazmırlar. Sizdən xahiş edirəm ki, Səfərov Rafailin cinayət əməllərinə görə onun barəsində tədbir görəsiniz.
Cənab Prezident!
Oğlum 2-ci Qarabağ müharibəsinin ilk günündən ağır döyüşlərin iştirakçısı olub. Döyüşlərdə göstərdiyi şücaətlərinə görə 6 medalla təltif olunub. Lakin Səfərov Rafail kimi cinayətkar, öz ətrafına 3–4 nəfər özü kimi cinayətkarı yığıb, 3 milyon manatlıq əmlakımızı ələ keçirib, bizim pulumuzla öz adına neçə sayda dəyəri külli miqdarda olan əmlaklar alıb, özününküləşdirib.
Sizdən xahiş edirəm, göstəriş verin, Azərbaycan Respublikasını prokurorluq orqanları Rafailin cinayət əməllərini düzgün araşdırsınlar. Mən bilirəm ki, cinayətkarlar hörmətli Bəylər müəllimin qohumunun adından istifadə edərək, toxunulmazlıq alıblar.
Szidən acizanə dərəcədə kömək istəyirəm. Məcburiyyət qarşısında qalmışam ki, bu gündən etibarən  şikayət ərizələrimi Sizə çatdırana qədər hər gün ərizə yazıb Sizə göndərəcəm. Bəylər müəllimdən də xahiş edirəm ki, bizə kömək etsin, onun adınıdan istifadə edib, insanların əmlakına əl qoyurlar.
Onu da qeyd edim ki, Rafailə oğlumun döyüş iştirakçısı olduğunu, qarın altında qalıb müalicəyə ehtiyacı olduğunu deyirəm. O isə mənə deyir ki, gəl, sənə o medallardan 100-nü verim. Mən inana bilmırəm ki, Bəylər müəllimin belə bir qohumu var və o, onun arxasında durur. Çünki Cənab Prezidentin "sağ əli" olan şəxs heç vaxt bu addımı atmaz".
Jalə FAMİLQIZI 
Redaksiyadan: Yazıda adları çəkilən şəxslərin və qurumların mövqeyini dərc etməyə hazırıq.