REAL Partiyasının sədri İlqar Məmmədov “Feysbuk” səhifəsində ADR Hərəkatının rəhbəri Qubad İbadoğlunu sərt şəkildə tənqid edərək, onu reketçilikdə ittiham edib.

O, Q.İbadoğlunun paylaşdığı anonsu skrin edərək öz səhifəsinə qoyub və yazıb: “Elə bilirdim 1990-ların və 2000-lərin şantajçı “anons jurnalistikası” əsasən tarixdə qaldı. Rüşvətxor icra başçıları haqqında anons verib pay müqabilində sonra daha yumşaq yazan ya da heç yazmayan “azad" ya da "müxalif" media redaktorlarını bir çoxunuz xatırlayırsınız.

Amma yox, tarixdə deyil, hələ də gerçəkliyimizdır. İndi bu ənənəni qrant lazım olanda “vətəndaş cəmiyyəti” donunu geyinən, qrant çatmayanda isə özünə “siyasətçi” adını götürüb peşəmizi ləkələməyə can atanlar edir. Bu axşama qədər hansı bank bu “siyasətçiyə” adının çəkilməməsi müqabilində pul ya da başqa imtiyaz çatdırarsa cinayət məsuliyyətinə cəlb edilməlidir. Bu cür sözü olan sözünü birbaşa deməlidir! Anons nədir??”İlqar Məmmədovun ittihamlarına ADR Hərəkatının təşkilat məsələləri üzrə müavini Ədalət Yusifov cavab verib.
“Bütün Azərbaycan cəmiyyətinə siyasi, ictimai, sosial kimliyi çılpaqlığı ilə məlum olduğu halda "üzünə üz taxıb" hələ də "siyasətdə" mən də varam düşüncəsilə "evcik-evcik" oyunu ilə məşğul olan cənab İlqar Məmmədov, küçə uşaqlarına xas "basyak" təfəkkürlə, ağasına sədaqətli lakey duruşla, müxalif maska taxmaqla "başını başlara" qoşub siyasi gündəmdə qalmaq uğrunda hər şeyindən keçməyi "siyasi peşə" hesab etmək yalnız sənlik ola bilər” - deyə, REAL sədrinin ittihamlarına reaksiya verib.