Yayda həkimlər meyvə və giləmeyvələri daha çox yeməyi tövsiyə edir. Lakin, bu qaydanı şəkərli diabet xəstələrinə tam şəkildə aid etmək olmaz.
Mediatv.az xəbər verir ki, bu qrup xəstələr meyvələrin qəbulunu məhdudlaşdırmalı, bəzi meyvələri ümumiyyətlə qəbul etməməlidir. Bu xəstəlik zamanı pəhriz müalicənin əsas tərkib hissəsi sayılır. Bu səbəbdən xəstəliyin gedişatını ağırlaşdırmamaq üçün bu pəhrizə mütləq əməl etmək lazımdır.
Şəkərli diabet xəstələri bu meyvələri yeyə bilərlər:
1. Alma. Bu meyvələr şəkərli diabet zamanı ən faydalı sayılır. Gün ərzində 1-2 ədəd yemək olar.
2. Sitrus meyvələri (limon, portağal, qreypfrut, naringi). Qreypfrut şəkərli diabet xəstələri üçün ən faydalı meyvələrdən biridir. Gün ərzində 1 ədəd.
3. İstənilən giləmeyvələr – qarağat, motmotu, moruq, çiyələk, albalı və s. (şirin gilasdan başqa). Gün ərzində 1 ovuc giləmeyvə yemək olar.
4. Kivi. Gün ərzində 1-2 ədəd.
5. Yemiş, qarpız. Gün ərzində 1 kiçik dilim.
6. Qavalı, ərik, şaftalı, armud. Gün ərzində 2 ədəd (orta ölçüdə).
7. Nar. 1 ədəd (orta ölçüdə).
Nəzərə almaq lazımdır ki, gün ərzində 1-2 növ meyvə yemək olar (məsələn, 1 alma və 2 qavalı gün ərzində və ya 1 qreypfrut və 1 kiçik dilim yemiş) və bu meyvələri qida qəbulları arası yemək daha yaxşıdır.
Banan, əncir, xurma, üzüm kimi meyvələr şəkərli diabet zamanı əks-göstəriş sayılır.