Yeniavaz.com xəbər verir ki, tender müsabiqənin qalibi “Quality Repair” MMC (VÖEN-4300723501) adlı şirkət olub.
Müsabiqənin şərtlərinə görə, “Quality Repair” şirkəti Qax şəhərinin küçə və prospektlərində rəngləmə, Şəki-Qax-Zaqatala yolunun şəhər ərazisindən keçən hissəsində və parklarda abadlıq quruculuq işləri görəcək. Qeyd olunan işlər üçün “Quality Repair” MMC-yə 136 min 326 manat 64 qəpik ödəniləcək.
Məlumat üçün bildirək ki, müsabiqənin qalibi olan “Quality Repair” MMC cəmi 5 ay əvvəl – 30.03.2020-ci il tarixində dövlət qeydiyyatına alınıb.
Onu da bildirək ki, bu “Quality Repair” MMC –nin qalib gəldiyi ilk tender müsabiqəsi deyil. 10 gün əvvəl “Quality Repair” MMC Qax rayon İcra Hakimiyyətinin inzibati binasının təmiri üçün keçirilən tender müsabiqəsinin də (kotirovka sorğusu) qalibi olub. İcra Hakimiyyəti inzibati binanın təmiri üçün “Quality Repair” MMC-yə 9 min 987 manat 54 qəpik ödəniləcək.
Qeyd edək ki, "Dövlət satınalmaları haqqında" Qanunun 6-cı maddəsində malgöndərənlərin (podratçıların) ixtisasına dair tələblər yer alıb. Həmin maddənin 6.2.1-ci bəndində açıq şəkildə yazılır ki, satınalma müqaviləsinin icrasını təmin etmək üçün müvafiq sahədə peşəkarlığının, təcrübəsinin, texniki və maliyyə imkanlarının, işçi qüvvəsinin, idarəetmə səriştəsinin, etibarlığının olması lazımdır.
Onu da bildirək ki, bugünə kimi bir-çox dövlət qurumlarının elan etdiyi tenderlərin qalibləri bir-neçə ay əvvəl yaranan, nəinki rəsmi veb-səhifəyə, hətta sosial şəbəkə hesabına sahib olmayan şirkətlər olub.
Məlumat üçün qeyd edək ki, Qax rayon İcra Hakimiyyətinin başçısı Musa Şaban oğlu Şəkiliyevdir. Musa Şəkiliyev bu vəzifəni 2010-cu ildə xalası oğlu Mübariz Əhmədzadədən “təhvil alıb”.
Rayon İcra Hakimiyyətinin başçısı Musa Şəkiliyev həm də Azərbaycan Meliorasiya və Su Təsərrüfatı ASC-nin sədri Əhməd Əhmədzadənin xalası oğludur.
Musa Şəkiliyev başçı olduğu Qax rayonunda onun yaxın ətrafı həm geniş biznes fəaliyyətilə məşğul olur, həm də yüksək vəzifələr daşıyırlar.
2013-cü ilə kimi Qax Mərkəzi Xəstəxananın baş həkimi Musa Şəkiliyevin xalası oğlu və eyni zamanda Əhməd və Mübariz Əhmədzadələrin qardaşı olan Fərman Əhmədzadə olub. Fərman Əhmədzadə 2013-cü ildə vəfat etdikdən sonra onun yerinə oğlu, yəni Musa Şəkiliyevin xalasının nəvəsi Tərlan Əhmədzadə “təyin olunub”.
Musa Şəkiliyevin digər bir xalasının nəvəsi - Vüqar Əhmədzadə isə DSMF Qax rayon şöbəsinin müdiridir.
Musa Şəkiliyevin qardaşı Eldəniz Şəkiliyev isə rayonun ən böyük təsərrüfat müəssisələrindən biri olan (Nİzamnamə kapitalı 507 min 384 manat) “Qax-Tütün” ASC-nin sahibidir. Musa Şəkiliyevin 2014-cü ildə imzaladığı sərəncama əsasən qardaşı Eldəniz Şəkiliyevin şəhərin Aydın Məmmədov küçəsində ümumi sahəsi 2144,7 kv. metr olan kafe tikib.
Bundan başqa rayonda Musa Şəkiliyevin xalasi oğlu və hazırda Zaqatala rayon İcra Hakimiyyətinin başçısı olan Mübariz Əhmədzadənin adına rəsmiləşdirilən 54 700 kv. metr olan istirahət mərkəzi (Qaxbaş kəndi) fəaliyyət göstərir. Qaxbaş kəndində Mübariz Əhmədzadənin oğlu Çoşqun Əhmədzadənin sifarişi əsasında 2 ədəd yaşayış evi də inşa olunub. Çoşqun Əhmədzadə Dövlət Gömrük Komitəsi sədrinin 100/1185Ş saylı, 14 avqust 2018-ci il tarixli əmri ilə Bakı Baş Gömrük İdarəsi rəisinin birinci müavini təyin edilib.
Qaxbaş kəndi həm də Musa Şəkiliyevin digər bir xalası nəvəsi Cuma Əhmədzadənin (Əhməd Əhmədzadənin oğlu) şirkətlərinin qeydiyyatda olduğu kənddir. Eyni zamanda Mərkəzi Bankın sədri Elman Rüstəmovun kürəkəni olan Cuma Əhmədzadənin təsisçisi olduğu “Muğal”, “Uluyurd” şirkətlərinin hüquqi ünvanı Qaxbaş kəndi göstərilib.
