Azərbaycanlı məmurların Gürcüstanda kazino açması ilə bağlı maraqlı məlumat əldə etmişik. 

Belə ki, Gürcüstanda azərbaycalıların yaşadıqları Borçalı mahalının Kəpənəkçi kəndi yaxınlığında, Tiflis yolunun üstündə inşa olunan otel tipli obyektin üst mərtəbəsi kazino üçün nəzərdə tutulub.

Bunu Qaynar.info-ya Gürcüstanda yaşayan soydaşlarımızdan biri deyib. Onun sözlərinə görə, bir neçə məmurun birgə “layihəsi” olan bu otelin tikintisi artıq başa çatıb və təmir olunur. Otelin üst mərtəbəsi kazino kimi istifadəyə veriləcək və həmin məmurlar boş vaxtlarını “gözdən və könüldən uzaq” olan qonşu ölkədə keçirəcəklər.

Obyektin qonşu ölkədə açıqlması ona hesablanıb ki, ölkədə bu məsələ xüsusi diqqətdə saxlanılır və vaxtaşırı bu obyektlər ifşa olunur. Gürcüstana isə hüquq-mühafizə orqanlarımızın müdaxiləsi mümkünsüz olduğundan sözügedən məmurlar qanundan asanlıqla yayına bilərlər.

Mənbə onu da iddia edir ki, ötən il həmin məmurlardan biri Gürcüstanda yaxalanaraq görüntüyə alınıb. Ancaq məsələnin böyüməsinin qarşısını hansısa “sirli əl” alıb.

Qeyd edək ki, mənbə həmin məmurun adını da açıqlayıb. Hazırda bununla bağlı araşdırma aparırıq və yaxın zamanlarda onların adlarını açıqlayacağıq.