Dövlət Təhlükəsizlik Xidməti (DTX) Mehdiyev Ramiz Ənvər oğlu, Abbasov Abbas Aydın oğlu, Kərimli Əli Əmirhüseyn oğlu və digər şəxslərin hakimiyyətin zorla ələ keçirilməsinə, dövlətin konstitusiya quruluşunun zorla dəyişdirilməsinə yönələn hərəkətlər etmələri ilə bağlı məlumat yayıb. Qurumun açıqlamasında bildirilir ki, Ramiz Mehdiyev cinayət yolu ilə əldə edilmiş 17 milyon manatdan artıq pul vəsaitini leqallaşdırıb. Mövzu ilə bağlı KONKRET.az-a açıqlama verən Müasir Müsavat Partiyasının sədri Hafiz Hacıyev bildirib ki, o, Ramiz Mehdiyevlə bağlı fikirlərini illər əvvəl səsləndirib:
“Artıq həqiqət öz təsdiqini tapır. Bugün Ramiz Mehdiyevlə birgə hakimiyyətin müxtəlif qollarından təmizlənməli olan adamlar çoxdur. Hakimiyyətin daxilində belə şəxslər var. Mən 2010-cu ildə bu məsələni qaldıranda bir çoxları etiraz edirdi. O vaxt məni susdurmaq istəyənlərdən bəziləri bu gün də dövlət strukturlarında təmsil olunurlar”.
Partiya sədri bildirib ki, məsələ bir neçə şəxslə məhdudlaşmır:
“Dövlət çevrilişini 5-10 nəfərlə etmək olmaz. Şəbəkə var və həmin şəbəkə tam şəkildə aşkar olunmalıdır. Nə qədər ki, bu proses yekunlaşmayıb, təhlükə qalır”.
Hafiz Hacıyev vurğulayıb ki, müəyyən qüvvələr həm ölkə daxilində, həm də xaricdə dövlət başçısına qarşı fəaliyyət göstərir, media və parlament daxilində də müəyyən təsir qrupları mövcuddur.
“Parlament buraxılmalıdır. Ramiz Mehdiyevin adamları həbs edilməli, əllərindəki qanunsuz vəsaitlər geri alınmalıdır. Təmizlənmə yarımçıq qalmamalıdır”, – deyə Hacıyev vurğulayıb.
Partiya sədri çıxışında Ziya Məmmədovun, onun ailə üzvlərinin, eləcə də sabiq milli təhlükəsizlik naziri Eldar Mahmudovun ailə üzvlərinin, Əbülfəz Qarayevin fəaliyyətinin də araşdırılmasının vacib olduğunu deyib.Onların da həbs olunmasının vacibliyini vurğulayıb. O, bildirib ki, bəzi şəxslər xaricdə Azərbaycan dövlətinin əleyhinə fəaliyyət göstərirlər və bu məsələlər hüquq-mühafizə orqanları tərəfindən yoxlanılmalıdır.
“Əgər ortada dövlət təhlükəsizliyi ilə bağlı ciddi məsələ varsa, bu proses sona qədər aparılmalıdır. Təqsirli bilinən şəxslər qanun qarşısında cavab verməlidir”, – deyə o, əlavə edib.шаблоны для dle 11.2