“Cərimələrini vaxtında ödəməyən bütün vətəndaşların ölkədən çıxışına yasaq qoymaq lazımdır.”
Deputat Elmira Axundova belə hesab edir.
Mediatv.az-ın Modern.az-a istinadən xəbərinə görə, deputat, deyib ki, oğurluq, avtomobil ələ keçirtmə, əmlakı qəsdən məhv etmə və ya zədələməyə görə, cərimələr sərtləşdirilir. Ancaq cərimələr artdıqca, onu ödəyən insanların sayı da azalır. Buna görə də, tədbirlər görmək lazımdır.
“Aliment ödəməkdən imtina etmə hallarına tez-tez rast gəlinir. Belə şəxslərə qarşı ölkədən çıxma məhdudiyyəti tətbiq olunur. Bu qadağanı digər cərimələri ödəməyənlərə qarşı da tətbiq etmək olar” – deyən deputat qeyd edir ki, bu cür hallarla mübarizə aparmaqdan ötrü Cinayət və İnzibati Xətalar Məcəlləsinə yeni maddələr əlavə edilməlidir.
Son dövrlər ölkə parlamenti müxtəlif sahələrdə cərimələrin artırılması ilə bağlı Cinayət və İnzibati Xətalar Məcəlləsinə bir sıra dəyişikliklər ediblər.
Hətta, ötən həftə kənd təsərrüfatı torpaqlarının təyinatı üzrə istifadə edilməməsinə görə, cərimələr artırılanda bəzi deputatlar bunu xalqın hesabına büdcənin doldurulması kimi dəyərləndirmişdilər.