Erməni silahlı qüvvələrinin təxribatları nəticəsində cəbhə bölgəsində gedən döyüşlərdə şəhid olan Azərbaycan Ordusunun giziri 1986-cı il təvəllüdlü Novruzov Ravil Elman oğlu doğulduğu Xızı rayonunun Giləzi qəsəbəsində torpağa tapşırılıb.

Mediatv.az xəbər verir ki, Şəhidin dəfn mərasimində Müdafiə Nazirliyinin, Səfərbərlik və Hərbi Xidmətə Çağırış üzrə Dövlət Xidmətinin, Xızı Rayon İcra Hakimiyyətinin rəsmiləri, şəhidin döyüş yoldaşları, rayon ictimaiyyətinin nümayəndələri və kənd sakinləri iştirak ediblər. Şəhidin atası Elman Novruzov torpaqlarımızın azadlığı uğrunda canından keçən oğlu ilə fəxr etdiyini söyləyib. Şəhid Ravil Novruzov torpağa tapşırıldıqdan sonra onun atasına Azərbaycan bayrağı təqdim edilib.



Bundan başqa şəhid olan Dilsuz Məmmədağa oğlu Qarayev də bu gün dəfn olunub. Ağcabədi rayonunun Hindarx qəsəbə sakini olan 1990-cı il təvəllüdlü gizir Dilsuz Qarayevin cənazəsi ötən gecə yaşadığı evə gətirilib. Yaylım atəşi açılıb, şəhid torpağa tapşırılıb.



Düşmənlə döyüşlərdə həlak olmuş müddətdən artıq hərbi xidmətdə olan qulluqçu, 22 yaşlı əsgər Elmidar Səlimxan oğlu Səfərov da anadan olduğu Neftçala rayonunda dəfn edilib. Şəhid doğulduğu Aşağı Qaramanlı kəndində torpağa tapşırılıb.



Eyni zamanda qoşunların təmas xəttində ermənilərin hücumunun qarşısını alarkən həlak olan Azərbaycan Ordusunun əsgəri, 19 yaşlı Sərxan Bağırov və Azərbaycan Ordusunun giziri, 1986-cı il təvəllüdlü Novruzov Ravil Elman oğlu da dəfn edilib.