Mətbuat Şurasının (MŞ) Şikayətlər üzrə Komissiyasının iclası keçirilib.

Mediatv.az-a şuradan verilən xəbərə görə, MŞ sədrinin müavini, Beynəlxalq Avrasiya Mətbuat Fondunun (BAMF) rəhbəri Umud Rəhimoğlunun başçılıq etdiyi komissiya 4 sayt barədə məsələyə baxıb.

İlk olaraq, Yardımlı Rayon İcra Hakimiyyətinin “Bizimxeber.az” saytı ilə bağlı müraciəti müzakirə olunub. Komissiya rəyə gəlib ki, şikayət doğuran yazılarda balansın gözlənilməməsi, qarşı tərəfin mövqeyinə aydınlıq gətirilməməsi yazılarda digər etik pozuntulara da yol açıb: “Nəticədə rayon rəhbərinin ünvanına real faktlara, dəlil-sübutlara söykənməyən fikirlər yayımlanıb”.

Komissiya şərəf və ləyaqətin təhqirinə, ictimai nüfuzun ləkələnməsinə yönələn cəhdlərin yolverilməz olduğunu əsas götürərək bu kütləvi informasiya vasitəsinə həmin materialların saytdan çıxarılmasını, təkzib, yaxud qarşı tərəfin mövqeyinin ifadəsini tapdığı məktubunun təqdim olunmasını tövsiyə edib. Komissiya şikayət məktubunda da bir sıra yolverilməz ifadələrin yer almasını məqbul hal saymayıb.

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının “Xeber.info” və “Arqument.az” saytları ilə bağlı müraciətinin müzakirəsi hər iki KİV-ə MŞ-nın xəbərdarlığının edilməsi ilə yekunlaşıb. Çıxarılan rəydə göstərilib ki, saytların bu il yanvarın 23-də yayımladığı eyni sərlövhəli və məzmunlu yazıda “Azərbaycan Jurnalistlərinin Peşə Davranışı Qaydaları”nın əksər prinsip və bəndlərinin tələbləri pozulub.

Araşdırılma aparılmadan, balans gözlənilmədən təqdim olunan mətbu materialda qərəz, sifariş icrası aşkar nəzərə çarpdığından jurnalistikanın ali prinsipi sayılan həqiqətə xidmət arxa plana keçib. Bunun nəticəsində yazıda Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasına rəhbərlik edən şəxsin şərəf və ləyaqətinin təhqirinə, ictimai nüfuzunun ləkələnməsinə cəhdlər edilib. Saytların baş redaktorları iclasda səslənən iradlarla razılaşıblar. Komissiya şikayət səbəb olan materialların bu KİV-lərdən çıxarılmasını tövsiyə edib. Eyni zamanda bütün bunlar əsas götürülərək “Xeber.info” və “Arqument.az” saytlarına Mətbuat Şurasının xəbərdarlığı olunub. 
Komissiya Azərbaycan İnformasiya Agentliyi («Aia.az» saytı) barədə də eyni ölçünü götürüb. Bu zaman nəzərə alınıb ki, saytın Abşeron Rayon Dövlət Arxivinə və onun rəhbərliyinə yanaşma tərzində, həmçinin təqdim etdiyi yazıda jurnalist imicinə xələl gətirən hallar mövcuddur: “Belə hərəkət isə xəbərdarlıq üçün əsas verir”.