Sakinlərin yolu bağlamasına səbəb Lək kəndinə qaz çəkilməməsidir. Kəndlilər bununla bağlı dəfələrlə aidiyyatı qurumlara müraciət ediblər. Onlar soyuq qış günlərində evlərini odun və dizel yanacağı ilə qızdırdıqlarını deyirlər.

Aksiya yerinə rayon icra başcısının birinci müavini Vahid Qarayev, "Azəriqaz"ın Bərdə nümayəndələyinin rəhbəri Ramiz Adıgözəlov və rayon polisinin əməkdaşları gəliblər. Uzun sürən danışıqlardan sonra sakinlər avtomobil yolunu açıblar. Rəsmi qurumlardan bildirilib ki, yaxın günlərdə kənddə qaz çəkilişi aparılacaq.

Məsələ ilə bağlı sayt Bərdə Rayon İcra Hakimiyyəti ilə əlaqə saxlayıb. Bildirilib ki, rayonda belə bir aksiya olmayıb. Sakinlər avtomobil yolunu bağlamayıb. Ümumiyyətlə, növbəti ildə Bərdənin nəinki Lək kəndi, o cümlədən qazsız qalan digər kəndləri də mavi yanacaqla təmin ediləcək.