Xaləddin İsgəndərov dəhşətli təyyarə qəzasından sağ çıxan I qrup əlinin evini niyə uçurdu?

Naxçıvan şəhərində anadan olmuş, hazırda Bakı şəhəri Nəsimi rayonu, 3-cü mikrorayon, H.B.Əliyev küçəsi 4/63 ünvanında yaşayan I qrup ömürlük əlil, Kələntərov İntiqam İbrahim oğlu Qaynar.info-ya şikayət məktubu ünvanlayıb. 

Şikayətçı bildirir ki, Türkiyədə müalicədə olarkən Binəqədi Rayon İcra Hakmiyyəti ona verilmiş evi uçurub. 

İbrahim Kələntərovun müraciətini olduğu kimi təqdim edirik: 

Məlumat üçün yazıb Sizə bildirirəm ki, mən 1995-ci ildə Naxçıvan səmasında baş verən təyyarə qəzasından möcüzə nəticəsində sağ çıxmışam. I qrup əliləm, çətinliklə hərəkət edə bilirəm. Yaxşı adamların diqqət və qayğısı, Allah sevgisi indiyədək məni yaşadıb, nəfəs verib. Elə bu günün özündə  evimi viran qoymuş bəzi vəzifəli şəxslərin təhdidləri, özbaşınalığı  qarşısında qanunlarımıza və sizin kimi peşəkar jurnalistlərə güvənərək duruş gətirirəm, haqqın və ədalətin zəfər çalacağına inanıram. 

Səhhətimlə əlaqədar müayinə məqsədilə 2014-cü il avqust ayının 12-də Türkiyəyə getmişdim. Bir sıra tibbi prosedurları keçdikdən sonra avqustun 25-də Bakıya qayıtdım. 2002-ci ildə Binəqədi rayonu Sulutəpə qəsəbəsində Binəqədi rayon İcra Hakimiyyəti başçısının sərəncamı əsasında Ruslan  Allahverdiyev küçəsində əldə etdiyim torpaq sahəsində yenicə tikdirdiyim evin uçurulduğunu gördükdə dəhşətə gəldim. Öyrəndim ki, Türkiyədə müayinədə olduğum günlərdə Binəqədi Rayon İcra Hakimiyyətində  işləyən Mirpaşa və Çingiz adlı şəxslər ətrafda yaşayan sakinlərin gözü qarşısında qonşumun daş hasarını ekskovatorla uçuraraq həyətimə daxil olmuş və mənə məxsus tikilini həmin texnika vasitəsilə tamamilə yerlə yeksan etmişlər. Nəticədə mənə xeyli miqdarda maddi və mənəvi ziyan dəymişdir. Keçirdiyim stress və sinir krizləri səbəbindən sağlamlığımda yenidən ciddi problemlər yaranmışdır.       

Vətəndaşın şəxsi əmlakını viran qoyan həmin şəxslər öz qanunsuz əməllərini utanıb çəkinmədən Binəqədi rayon icra hakimiyyəti başçısının göstərişi əsasında həyata keçirdiklərini söyləmişlər. Heç bir hüquqi məcraya söykənməyən, insanlığa və normal məntiqə yaraşmayan bu özbaşınalığın hüquqi qiymətinin veriləcəyi ümidi ilə yaşayıram. Binəqədi Rayon İcra Hakimiyyətində  işləyən Mirpaşa və Çingiz kimi evyıxanlar qanunsuz əməlləri ilə xalqı dövlətdən narazı salmağa çalışırlar. 

Hesab edirəm ki, belələri və onlara havadarlıq edən məmurlar cəzasız qalmamalıdır. Odur ki, baş verən hadisənin ictimailəşdirilməsi, əlaqədar dövlət qurumlarının nəzərinə çatdırılması üçün jurnalist araşdırılmasına ehtiyac var. Acizanə surətdə xahiş edirəm, evimi başıma uçuran, məni intihar həddinə çatdıran vəzifəli  şəxslərin aşkar edilməsi üçün faktiki yaşadığım Sulutəpə qəsəbəsi Ruslan Allahverdiyev küçəsinə jurnalist göndərilməsinə göstəriş verəsiniz. Bu qərarınız bəlkə də məni gələcəkdə ata biləcəyim özünəqəsd addımından daşındırdı...

Hörmətlə: Kələntərov İntiqam İbrahim oğlu"

Xatırladaq ki, 5 dekabr 1995-ci ildə “AZAL”a məxsus Naxçıvan-Bakı reysi ilə hərəkət edən “TU-134” təyyarəsi qalxdıqdan bir neçə dəqiqə sonra sol mühərrik sıradan çıxıb, bort mühəndisi isə səhvən sağ mühərriki söndürüb. Pilot təyyarəni şumlanmış sahəyə endirməyə qərar verib. Yüksək gərginlikli elektrik xəttinə toxunan təyyarə alışıb, 82 nəfərdən 52-si həlak olub. Həmin təyyarədən möcüzə nəticəsində sağ çıxanlardan biri də I qrup ömürlük əlil, İntiqam Kələntərov olub.