Dövlət Şəhərsalma və Arxitektura Komitəsinin Bakı Dövlət Layihə İnstitutunun direktor müavini Şakir Eyvazov Sumqayıtda “Xruşşov” layihəli yaşayış binalarında aparılan şüşə konstruksiyalı fasadlaşma işləri nəticəsində qanuni eyvanları sökülən vətəndaşlara məsələnin müsbət yöndə həll olunacağını bildirsə də, həmin binalarda işi icra edən iş icraçısı bunun qeyri mümkün olduğunu bildirib. 

Şakir Eyvazov lazımi instansiyalar ilə danışıb məsələnin vətəndaşların xeyrinə həll ediləcəyini və bununla bağlı iş icraçısına müvafiq tapşırıq verəcəyini deyib. İş icraçısı isə öz növbəsində bildirib ki, təqdim olunan layihə əsasında iş gördüyünü və bu layihəyə İnstitut tərəfindən düzəliş edilməli və təsdiqlənməlidir. Layihənin dəyişdirilməsini əlavə maliyyə məsrəfləri ilə qarşılaşacağını deyən iş icraçısı rəsmi göstəriş olmadan layihədən kanar heç bir iş görə bilməyəcəyini qeyd edib. 

Fasadlama nəticəsində eyvanlarının ölçüləri kəskin şəkildə kiçildilən sakinlər ölkə başçısına müraciət etməyə hazırlaşırlar.  

Qeyd edək ki, Sumqayıt şəhərində Sülh prospektinin 36-cı məhəllə yerləşən hissəsində Xruşşov layihəli yaşayış binalarında aparılan şüşə konstruksiyalı fasadlaşma işləri vətəndaşlar arasında ciddi narazılığa səbəb olmuşdu.