Azərbaycan Respublikası Təhsil Nazirliyinin Təsərrüfat Hesablı Əsaslı Tikinti və Təchizat İdarəsi bu 2 böyük tenderi yekunlaşdırıb.

"DİA-AZ" xəbər verir ki, tenderlər əsasən respublikanın təhsil müəssisələrində aparılacaq işləri əhatə edir.

Birinci tender çərçivəsində respublikanın təhsil müəssisələrində kommunal-kommunikasiya işlərinin satınalınması nəzərdə tutulub. Tenderin qalibi "Mühəndislik Tikinti Təchizat" MMC (VÖEN: 2005667751) olub və müqavilənin dəyəri 8 244 969 AZN təşkil edir.

İkinci tender isə respublikanın bir sıra məktəbəqədər və ümumtəhsil müəssisələrinin təmiri və inventarlarının bərpası işlərinə həsr olunub. Burada da qalib "Mühəndislik Tikinti Təchizat" MMC (VÖEN: 2005667751) olub, və tenderin dəyəri 11 467 624 AZN təşkil edir.

Beləliklə şirkət iki tenderdən ümumilikdə 19,7 milyon manat sifariş alıb.

Qeyd edək ki, "Mühəndislik Tikinti Təchizat" MMC 2019-cu ildə təsis olunub və nizamnamə kapitalı 2 110 AZN-dir. Şirkətin qanuni təmsilçisi Eltun Mahmudlu Ənvər oğludur. Hüquqi ünvanı Bakı şəhəri, Xətai rayonu, Ramiz Quliyev, ev 15A-dır.