Sizi paytaxtın Xətai rayonu, şəhid Xaliq Əzizzadə küçəsinin bir qrup sakini narahat edir. Şikayətimizə səbəb şəhid adını daşıyan bu küçədə yaranmış açınacaqlı durumdur. Belə ki, burada, Dənizcilik Məktəbinin yataqxanası ətrafında, son zamanlar açılmış maşın yuma məntəqələri, avtotəmir, ət kəsimi məntəqələri və dönərxanalar səkiləri zəbt ediblər, ərazidə səliqə-səhman və təmizlik tam pozulub. Nəticədə sakinlər bu küçə ilə ümumiyyətlə hərəkət edə bilmirlər. Müxtəlif obyekt sahibləri səkiləri qanunsuz zəbt ediblər və yol infrastrukturu burada faktiki “yoxa çıxıb”. Xətai rayon icra hakimiyyətinə, yerli MİS, Şəhərsalma və Arxitektura Komitəsinə, Qida Təhlükəsizliyi Agentliyinə və digər aidiyyatı qurumlara müraciətlər edilsə də, bir faydası olmayıb. Bunu nəzərə alaraq sizdən xahiş edirik, şəhid Xaliq Əzizzadə adını daşıyan bu küçədə yaranmış açınacaqlı durumu saytınız vasitəsilə işıqlandırasınız.