Uğurlu xarici siyasətin arxasında Prezident İlham Əliyevin məntiqli və təmkinli siyasəti, qəbul etdiyi çevik qərarlar və verdiyi tapşırıqlar durur.

Mediatv.az  xəbər verir ki, bunu Trend-ə Azərbaycan Prezidenti Administrasiyası Xarici siyasət məsələləri şöbəsinin müdir müavini Hikmət Hacıyev deyib.

H.Hacıyev qeyd edib ki, Prezident İlham Əliyevin rəhbərliyi ilə Azərbaycan Respublikası dövlət quruculuğunun bütün istiqamətlərdə, o cümlədən xarici siyasət sahəsində ciddi uğurlara imza atıb: "Azərbaycan Respublikası sözün əsl mənasında müstəqil xarici siyasət yürüdən ölkədir. Bu müstəqil siyasətin əsasını Azərbaycanın milli maraqları və ölkə vətəndaşlarının mənafeyinin qorunması təşkil edir. Əsası ulu öndər Heydər Əliyev tərəfindən qoyulan bu strategiya tarixi təcrübəni, geosiyasi reallıqları nəzərə alaraq, çoxistiqamətli və tarazlaşdırılmış əsasda praqmatik və realist prinsiplərlə həyata keçirilir. Etiraf etmək lazımdır ki, dünya miqyasında heç də hər bir dövlət müstəqil xarici siyasət yürütmək iqtidarında deyildir".

O bildirib ki, Azərbaycan xalqı daxili siyasətdə olduğu kimi, xarici siyasət sahəsində də dövlət başçısının yürütdüyü xətti tam şəkildə dəstəkləyir:

"Azərbaycan xarici siyasət sahəsində nailiyyətlərini Ermənistanın ölkəmizə qarşı davam edən hərbi təcavüzü, erməni lobbi dairələri və onların havadarlarının ölkəmizə qarşı apardığı psixoloji müharibə və dezinformasiya kampaniyalarına baxmayaraq əzmlə davam etdirir. Məqsədyönlü fəaliyyətin nəticəsidir ki, bütün beynəlxalq ictimaiyyət Azərbaycanın ərazi bütövlüyünü, suverenliyini, sərhədlərinin toxunulmazlığını və Ermənistan-Azərbaycan münaqişənin məhz bu prinsiplər əsasında həllini dəstəkləyir".

PA rəsmisi vurğulayıb ki, mürəkkəb geosiyasi regionda yerləşən Azərbaycan sabitlik adasıdır: "Dövlət başçısının qeyd etdiyi kimi, bu gün Azərbaycanda sabitlik və təhlükəsizlik tam şəkildə təmin olunub, ölkəmizdə daxili risk mənbələri mövcud deyildir. Çevik və prinsipial xarici siyasət vasitəsilə xaricdən olan hədə və təhdidlərin qarşısı alınır, ölkəmiz ətrafında xoşməramlı əməkdaşlıq mühiti yaradılır və daxili inkişaf üçün münbit zəmin yaradılır. Eyni zamanda ölkəmizin daxili inkişafı xarici siyasətimizin müstəqilliyini və strateji manevr qabiliyyətini təmin edir".

H.Hacıyev əlavə edib ki, gərgin və nizamsız beynəlxalq münasibətlər şəraitində ölkəmiz beynəlxalq hüququn norma və prinsipləri əsasında xarici siyasət yürüdərək, heç bir dövlətin daxili işlərinə qarışmır və özünün də daxili işlərinə qarışmağa heç bir dairəyə imkan vermir:

"Azərbaycan Respublikası beynəlxalq münasibətlərin layiqli, etibarlı və məsuliyyətli üzvüdür. Ölkəmizin malik olduğu nüfuz və diplomatik resurslar yalnız yerləşdiyimiz regionla məhdudlaşmır, beynəlxalq xarakter daşıyır. İkitərəfli əməkdaşlığımızın coğrafiyası və məzmunu daim genişlənir, Azərbaycanın tərəfdaşlarının sayı artır. Ölkəmiz müxtəlif əməkdaşlıq layihələri ilə region və onun hüdudlarından kənarda sülh, sabitlik və çiçəklənmənin sərhədlərinin genişləməsinə töhfə verir. Başqa sözlə desək Azərbaycan bu gün təhlükəsizliyin və sabitliyin ixracatçısıdır. Həmçinin, Azərbaycan müasir dövrün hədə və təhdidlərinin qarşısının alınmasında beynəlxalq birliyin səylərini yaxından dəstəkləyir".

Şöbə müdirinin müavini bildirib ki, Bakı bu gün beynəlxalq münasibətlərdə diplomatik paytaxt rolunda çıxış edir. Tamamilə fərqli fikir və baxışlara, hətta ziddiyyətlərə malik ölkələr və təsisatlar dialoq məkanı olaraq Bakını seçmələri heç də təsadüfi deyil: "Azərbaycanın təşəbbüsü ilə həyata keçirilən üçtərəfli regional əməkdaşlıq formatı beynəlxalq səviyyədə diplomatik yenilik kimi qəbul olunaraq, ikitərəfli əlaqələrimizi tamamlayır və yeni əməkdaşlıq imkanları yaradır".

H.Hacıyev deyib ki, Prezident İlham Əliyevin uzaqgörən siyasəti sayəsində dənizlərə çıxışı olmayan Azərbaycan Şərq-Qərb, Şimal-Cənub, Cənub-Qərb marşrutları üzrə dünya okeanlarını və qitələri birləşdirən nəqliyyat layihələrinin müəllifidir. Azərbaycan qlobal enerji təhlükəsizliyinə, o cümlədən Avropanın enerji təchizatına töhfə verən dövlətdir:

"Fəal ikitərəfli diplomatik səylərimiz çoxtərəfli müstəvidə aparılan ardıcıl addımlarla müşayiət olunur. Beynəlxalq gündəlikdə duran fundamental məsələlər üzrə Azərbaycanın prinsipial və qəti mövqeyi vardır. İntensiv diplomatik rəqabət şəraitində 2012-2013-cü illərdə Azərbaycanın 155 dövlətin dəstəyi ilə BMT Təhlükəsizlik Şurasının qeyri-daimi üzvü yerinə seçilməsi beynəlxalq ictimaiyyətin ölkəmizə olan yüksək etimadını bir daha nümayiş etdirdi. Azərbaycan şərəflə və yüksək peşəkarlıqla BMT Təhlükəsizlik Şurasına qeyri-daimi üzvlüyünü həyata keçirdi, beynəlxalq gündəm üçün aktual olan bir sıra təşəbbüslərin müəllifi kimi çıxış etdi.

Azərbaycanın Kimyəvi Silahların Qadağan olunması Təşkilatı, Atom Enerjisi üzrə Beynəlxalq Agentliyin icraiyyə şurasında, 2017-2019-cu illər üzrə BMT-nin İqtisadi və Sosial Şurasında (ECOSOC) üzvlüyü, 2018-2022-ci illər üzrə YUNESKO-nun Qeyri-maddi Mədəni İrsin Qorunması üzrə Hökumətlərarası Komitəsində təmsil olunması beynəlxalq ictimaiyyətin ölkəmizə olan davamlı etimad və dəstəyinin göstəricisidir. Həmçinin, 2019-2022-ci illərdə Azərbaycan 120 dövlətin təmsil olunduğu Qoşulmama hərəkatına sədrliyi həyata keçirəcək".

PA rəsmisi qeyd edib ki, Azərbaycan üzv olduğu beynəlxalq təşkilatlarda seyrçi mövqeyində deyil, təşəbbüskar rolunda çıxış edir və təşkilatların gündəliyinin formalaşdırılmasında öz mühüm rolunu oynayır. Tamhüquqlu üzv olduğumuz beynəlxalq təşkilatlarla bərabər Ərəb Dövlətləri Liqası, Afrika İttifaqı, Şanxay Əməkdaşlıq Təşkilatı və digər təsisatlarla əməkdaşlıq əlaqələri inkişaf etdirilir: "Dövlət başçısının qayğısı və diqqəti əsasında ötən müddət ərzində xarici siyasət fəaliyyətimizin təlim-tədris və maddi-texniki bazası inkişaf etdirilib və möhkəmləndirilib. 80-nə yaxın ölkədə Azərbaycanın diplomatik nümayəndəlikləri mövcuddur".

O vurğulayıb ki, bütün bu diplomatik nailiyyətləri Azərbaycan 15 illik qısa müddət ərzində əldə edib: "Uğurlu xarici siyasətin arxasında Prezident İlham Əliyevin düşünülmüş, məntiqli və təmkinli siyasəti, gərgin iş qrafiki, çoxsaylı və intensiv görüşləri, xarici səfərləri, mötəbər beynəlxalq tədbirlərdə çoxsaylı çıxışları, qəbul etdiyi çevik qərarları və verdiyi tapşırıq və təlimatları durur. Xarici siyasət fəaliyyəti mahiyyət etibarilə uzunmüddətli perspektivi əhatə edir. Dövlətimizin başçısının xarici siyasət sahəsində bu gün irəli sürdüyü bir sıra təşəbbüslər və layihələr vardır ki, Azərbaycan xalqı hələ qarşıdan gələn onilliklər ərzində onların bəhrəsini və faydasını görəcəkdir.

Beynəlxalq ictimai-siyasi və elmi dairələrdə ölkələrin yürütdüyü xarici siyasət "smart", "soft", "hard power" və sair bu kimi müxtəlif nəzəri modellər, doktrina və konsepsiyalarla izah olunur. Heç də təsadüfi deyildir ki, Prezident İlham Əliyevin yürütdüyü xarici siyasət "İntelligent Foreign Policy" (müdrik, zəkalı xarici siyasət) kimi qiymətləndirilir və xarakterizə olunur".