Dünən Beyləqan rayonunda baş vermiş dəhşətli qətlin bəzi təfərrüatları məlum olub.

Mediatv.az-ın məlumatına görə, Yuxarı Kəbirli kəndində 6 yaşlı oğlunu amansızlıqla öldürən Zahid İsgəndərov bir müddət əvvəl həyat yoldaşından ayrılıbmış. Onların iki övladı olub. 6 yaşlı oğlan və ondan kiçik olan qız uşağı.

Belə ki, Cəbrayıl rayonundan məcburi köçkün olan Mahirə adlı qadınla nikahı pozulduqdan sonra 6 yaşlı Ümid atası ilə, onun qızı isə anası ilə qalıb. Lakin münaqişələr bununla bitməyib. Z.İsgəndərov dəfələrlə keçmiş qayınatasının evinə gələrək onları ölümlə hədələyirmiş. Dünən kəskin psixoloji vəziyyətdə Z.İsgəndərov əvvəlcə 6 yaşlı oğlunu öldürüb, daha sonra isə keçmiş həyat yoldaşını qətlə yetirmək üçün onların evinə gedib. Qohum-qonşu yığışaraq onun qadını öldürməsinə mane olub və yaxalanacağını görüən Z.İsgəndərəv qaçıb.

Hazırda Z.İsgəndərovun tutulması istiqamətində iş aparılır.

*   *   *09:55

Beyləqanda dəhşətli qətl törədilib.

Rayon Polis Şöbəsindən APA-ya verilən məlumata görə, hadisə rayonun Yuxarı Kəbirli kəndində qeydə alınıb. Kənd sakini Zahid İsgəndərov 6 yaşlı oğlu Ümidin boğazını kəsərək qətlə yetirib. Z. İsgəndərov hadisəni törətdikdən sonra qaçıb. Hazırda onun tutulması istiqamətində əməliyyat-axtarış tədbirləri davam etdirilir.

İlkin məlumata görə, hadisə ailədaxili münaqişə zəminində törədilib.

Qətlə yetirilən Ümid 1-ci sinifdə oxuyurmuş.

Faktla bağlı Beyləqan Rayon Prokurorluğu tərəfindən Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, istintaq gedir.