Dövlət başçısının komandaya dəstəyi sözsüz ki, tədqirəlayiq haldır. Azərbaycan prezidenti bununla idmana, həmçinin futbola xüsusi qayğı göstərdiyini nümayiş etdirdi.

Piasport.az xəbər verir ki, görüşlə bağlı iki mənfi məqam diqqətimizi çəkdi. Öncədən qeyd edək ki, hər iki məqam "Qarabağ" klubu ilə bağlı idi.

Birincisi, "Qarabağ"ın prezidenti Abdulbari Gözəl görüşə qatılmamışdı. Klub prezidentlə görüşdə vitse-prezident, yəni Abdulbari Gözəlin oğlu Tahir Gözəl səviyyəsində təmsil olundu. Ata Gözəlin prezidentlə görüşə hansı səbəbdən qatılmamasını bilmirik. Amma yəqin ki, bundan vacib işi ola bilməzdi. İllərdir Azərbaycanın çörəyini yeyən, burdan milyonlar qazanan iş adamının Azərbaycan prezidenti ilə görüşə gəlməməsi, öz əvəzində oğlunu göndərməsi bu ölkəyə qarşı hörmətsizlik hesab olunmalıdır.

Daha bir hörmətsizliyi isə görüşdə Tahir Gözəl etdi. Bütün çıxış edənlər ayağa qalxsa da, Abdulbari Gözəlin oğlu ayağa qalxmaq zəhmətinə qatlaşmayıb, oturduğu yerdən danışdı. Sən iş adamı ola, hansısa böyük şirkətə rəhbərlik edə bilərsən. Amma bu sənə prezidentin qarşısında özünü istədiyin kimi aparmaq səlahiyyəti vermir. İstər Azərbaycan prezidenti olsun, istər ABŞ, istərsə də Banqladeş. Adi etik normalara riayət etmirsənsə, sənin bu ölkədə yaşmaq, pul qazanmaq haqqın yoxdu.