Bu gün Rio-2016 Yay Olimpiya Oyunlarında Azərbaycanın 5 idmançısı mübarizə aparacaq.

Mediatv.az-ın məlumatına görə, Azərbaycanın cüdodakı sonuncu təmsilçisi olan Uşangi Kokauri 100 kq-dan yuxarı çəki dərəcəsində mübarizəyə qoşulacaq. 

Bakı vaxtı ilə saat 17:00-də start götürəcək 1/16 final mərhələsində onun rəqibi latviyalı Artur Nikiforenko olacaq.

Saat 19:15-də atıcı Ruslan Lunyov 25 metr məsafəyə sürətlə atəş açma yarışına qatılacaq. 

Saat 01:15-də boksçu Albert Səlimov 60 kq. çəki dərəcəsində 1/4 finalda fransalı Sofian Umiha ilə qarşılaşacaq. Səlimov qələbə qazanarsa ən azı bürünc medalı təmin edəcək.

Saat 01:30-da digər boksçumuz Kamran Şahsuvarlı 75 kq. çəkidə 1/8 final döyüşündə rusiyalı Artyom Çebotaryovla üz-üzə gələcək.

Son olaraq saat 03:40-da atletikanın çəkicatma növündə Anna Skidan mübarizəyə başlayacaq. "B" qrupunda yer alan Skidanın 15 rəqibi olacaq.