Kömək məqsədilə yaxınlaşıb oğurluq edən şəxslər tutulub. 

Bakı Şəhər BPİ-dən “Mediatv.az”-a verilən məlumata görə, Nəsimi Rayon Polis İdarəsi (RPİ) 21-ci Polis Bölməsi (PB) əməkdaşlarının keçirdiyi əməliyyat-axtarış tədbirləri nəticəsində, martın 6-da günorta saatlarında “Nissan-Tida” markalı avtomobilin mühərrikində yaranan nasazlığa görə Füzuli küçəsində dayanan Bakı şəhər sakini Ülviyyə Təhməzovaya kömək məqsədilə yaxınlaşaraq avtomobildən 70 manat və mobil telefon oğurlamaqda şübhəli bilinən Bakı şəhər sakinləri, əvvəllər məhkum olunmuş 1979-cu il təvəllüdlü Taleh Arif oğlu Xaliqov və 1992-ci il təvəlüldü Ülvi Rafik oğlu Hənifəyev müəyyən olunaraq tutulub. Şübhəli şəxslərdən Ü.Hənifəyevdən üzərindən 2.307 qram tiryək aşkar olunaraq götürülüb. 

Digər bir oğurluqda şübhəli bilinən şəxslər isə Yevlax rayonunda tutulub. Belə ki, DİN Kriminalistik Təhqiqatlar İdarəsi, Bakı şəhər BPİ CAİ əməkdaşlarının birgə keçirdiyi əməliyyat-axtarış tədbirləri nəticəsində ötən il aprelin 19-da M.Müşfiq küçəsində İsgəndər Əzimovun evindən pəncərənin şüşəsini çıxarmaq yolu ilə 7900 manat və 3000 manat dəyərində qızıl-zinət əşyaları oğurlamaqda şübhəli bilinən Yevlax rayon sakini, 1995-ci il təvəllüdlü İsmayıl Namiq oğlu Vəliyev tutulub.