Vəkilin sözlərinə görə, prosesdə hal şahidləri dindirilib: “Cinayət işində dörd nəfər hal şahidi var, Milli Təhlükəsizlik Nazirliyi Nicat Quliyevin avtomobilində və bağ evində axtarış aparan zaman hal şahidi olublar. Onlar ifadə verdilər. 

İkisi avtomobildə, ikisi isə bağ evində aparılan axtarışın hal şahididir. Amma ifadələrində konkret heç nə demədilər. Əslində deyiləsi bir sözləri də yoxdur. Cinayət işində yazılıb ki, guya həmin şəxslər ərazidən təsadüfən keçirmiş, MTN əməliyyatçıları onlara yaxınlaşıb, məsələni və hüquqlarını izah edib, hal şahidi olmalarını təklif edib, onlar da razılaşıblar. Amma məhkəmədə sorğu-sual zamanı məlum oldu ki, hal şahidlərinin dördü də Novxanı bələdiyyəsində işləyir”.

N.Quliyev Naxçıvan Ali Məclisinin sədri Vasif Talıbovun doğma xalası oğludur. Türkiyə və Azərbaycanda bizneslə məşğul olan N.Quliyev 2005-ci il oktyabrın 19-da da müəmmalı şəkildə həbs edilib. Onun dövlət çevrilişinə cəhddə iştirakı araşdırılıb. Amma sonda ona rəsmi olaraq yalnız polisə müqavimət ittihamı verilib. Az sonra da azadlığa buraxılıb.

Məlumata görə, N.Quliyevin atası sovet dövründə DTK-da işləyib. N.Quliyev də Yevlaxda-atasının xidməti ezam olunduğu rayonda anadan olub. 

V.Talıbovun qohumları sırasında N.Quliyevə münasibəti həmişə isti olub. O, hər Naxçıvana gələndə V.Talıbov şəxsən onu qarşılamaq üçün aeroporta gedib və öz evində qonaq saxlayıb. N. Quliyevin 2005-ci ildə məhz Vasif Talıbovun xahişi və səyi nəticəsində həbsdən buraxıldığı da iddia olunur. Bu dəfə isə N.Quliyevlə bağlı ittihamlar o qədər ciddidir ki, V.Talıbov neçə aydır onu həbsdən buraxdıra bilmir.Qeyd edək ki,  1993-95-ci illərdə xarici iqtisadi əlaqələr naziri vəzifəsini müvəqqəti icra edən N.Quliyev  2004-cü ilədək Acarıstan prezidenti Aslan Abaşidzenin müşaviri postunda da çalışıb.