Sosial şəbəkə istifadəçiləri Fransa prezidenti Fransua Ollandın Qazaxıstana rəsmi səfəri zamanı çəkilmiş fotonu müzakirə mövzusuna çeviriblər. 

“Qafqazinfo” ria.ru-ya istinadən xəbər verir ki, Astanada olan Olland Qazaxıstan prezidenti Nursultan Nazarbayev tərəfindən çox isti qarşılanıb. Yerli mətbəxə qonaq edilməklə yanaşı, ona milli geyim də geyindirilib. Və prezidentlər bu formada görüntüləniblər. 

Sözügedən foto Nazarbayevin fotoqrafı tərəfindən çəkilib. Ollandın milli qazax papağındakı şəkli Qazaxıstan hökumətinin mətbuat xidməti tərəfindən rəsmi instagram səhifəsinə yerləşdirilib. 

Amma bir müddət sonra həmin foto silinib. İstifadəçilər Ollandın bu geyimini müxtəlif yumoristik və satirik kollajlar, “caps”larla paylaşıblar. 

Məsələyə hətta Fransanın baş naziri Manuel Vals da qarışıb:

“Olland böyük bir ölkənin prezidentidir. Qazaxıstana səfəri zamanı o, ciddi danışıqlar aparıb. Digər müzakirələr yersizdir”.