Türkiyədə Artes adlı itin adından məhkəməyə yazılmış ərizə qəbul olunub. Müraciət ərizəsində it heç bir borcu olmadığını, bu iş davam edəcəyi təqdirdə qaçacağını “bildirib”. 

“Yazoğlu ailəsi mənə hər hansı bir maddi mənfəət qarşılığında baxmayıb. Mən bu ailənin sevilən, dəcəl üzvüyəm. Şəxsimə aid belə bir borcum olmadığından əminəm. Məni hərracda alacaq biri ilə yaşaya bilmərəm. 7 ildir birlikdə yaşadığım xöşbəxt ailəm var. Əgər qərar həyata keçirilsə, o gün evdən qaçacağam. Heç sahiblərim də məni tapa bilməyəcək. Həbs işinin dayandırılmasını tələvb edirəm”. 

Qeyd edək ki, İstanbulda kafe sahibi Mahmud Yazoğlu icarə pulunu ödəyə bilmədiyi üçün qarşı tərəfin tələbi ilə məhkəmə onun bəzi qiymətli əşyalarına, o cümlədən itinə həbs qərarı qoyub. Məqsəd, bu əşyaları hərracda sataraq Yazoğlunun borcunu ödəmək olub. 

İtə həbs qoyulması ölkədə bir çox heyvan hüquqları təşkilatları və fərdlər tərəfindən kəskin etirazla qarşılanıb. 

İtn ərizəsini məhkəməyə təqdim edən vəkil Ayhan Karahan mövcud qanunvericiliyə görə ev itlərinə həbs qoyulmasının mümkün olmadığını vurğulayıb.