Azərbaycan Milli Elmlər Akademiyası (AMEA) Coğrafiya İnstitutunun direktoru Ramiz Məmmədov Ekologiya və Təbii Sərvətlər Nazirliyi (ESTN) hava şəraitindəki kəskin dəyişikliklə bağlı əhaliyə xəbərdarlıq etməsi mövzusu üzrə bir sıra suallarla müraciət edən Modern.az saytınin əməkdaşı ilə söhbətində Azərbaycan jurnalistlərinin ünvanına təhqirlər yağdırıb. Bildirib ki, Azərbaycanda savadlı jurnalist yoxdur:

“Siz jurnalistlər hamınız məni biabır etmisiniz. Nə açıqlama verəcəm?! Azərbaycan jurnalistləri “bezdarnı”, savadsız, heç nəyə yarayan deyillər. Azərbaycanda bir dənə də olsun jurnalist yoxdur”.

Onun dediklərinin ayıb olduğunu bildirildikdə isə “bayaq “küçük” sözü dedim haaa, Azərbaycandakı jurnalistlər o sözdən artığına layiq deyillər. Elə beləcə də yaz!” deyərək telefonu qapadıb.

Oxu.Az olaraq məsələni araşdırmaq üçün yenidən akademik Ramiz Məmmədovla əlaqə saxladıq. O, dediyi sözlərinin arxasında durduğunu və işlətdiyi ifadələrə görə üzr istəmək fikrinin olmadığını dedi:

“Yəqin ki, dediyim sözlərə görə zəng etmisən. Mən indiyə qədər Azərbaycanda savadlı jurnalistə rast gəlməmişəm və bir küçük də bizi biabır edib. Yenə də bu sözlərin üzərində dururam. Üzr istəmək fikrim yoxdur. Demişəm hələ biraz oyana da keçəcəm. Əgər mənim sözlərimi təhqir kimi qəbul edirsinizsə, mənimlə bundan sonra işləməyin. Küçük sözünü bütün jurnalistlərə yox, bir nəfər var ona aid eləmişəm”.