Onlar haqq səslərini dövlət başçısına çatdırmaq istəyirlər.

«Azadlıq»a müraciət edən bir qrup dəmiryolçu  Dəmir Yolları QSJ-dən etdikləri şikayətlərin cavabsız  qaldığından şikayətçidirlər. Onların mürajiətində deyilir:

«Biz dəmiryolçular dəfələrlə Bakı Şəhər İcra Hakimiyyətinin  rəhbəri Hacıbala Abutalıbova müraciət etmişik. Biz haqq səsimizi dövlət başçısına çatdırmaq istəyirik. Piket keçirmək üçün münasib yer ayrılmasını ondan xahiş etdik. Abıtalıbov isə müraciətimizi baş nazirin müavini Abid Şərifova göndərib.  

O isə müraciətimizi Dəmiryolu İdarəsinə göndərib.  İdarədən  sərnişindaşıma istehsalat  birliyinin rəisi  Elyar Muradovdan aldığımız cavabda bildirilir ki, biz heç kəsin haqqını yeməmişik. İllərdir haqqımızı  Elyar Muradovdan və  yol rəisinin birinci müavini Süleymanovdan  tələb edirik. Mənimsənilmiş əməkhaqqımızı, çörəkpulumuzu, ezamiyyət pulumuzu tələb edirik. Şikayətimizi qəbul etməyən bu dövlət məmurlarının əməllərindən aprelin 7-də Prezident Administrasiyasının qarşısında oturaq aksiya keçirəcəyik. Prezident İlham Əliyev bizi qəbul etməsə, benzin töküb özümüzü yandırmaq məcburiyyətində qalacağıq. İllərlə dövlətin hüquq-mühafizə orqanlarına müraciət edərək Dəmiryolunda korrupsiya, mənimsəmə faktlarını  demişik. Dəmiryolçuların təhqir və təhdid olunması faktları var. Haqqımızı tələb etdikdə bizi təhqir edirlər. Biz də səsimizi ölkə başçısına çatdırmaq üçün oturaq aksiya keçirmək qərarına gəlmişik».