Respublika Sanitar-Epidemiologiya Xidməti orqanlarının əməkdaşları sanitar-gigiyenik normaları pozduqlarına görə bəzi müəssisələrin sahiblərini cərimələyiblər.

Bu barədə SalamNews-a Səhiyyə Nazirliyindən məlumat verilib.

Bildirilib ki, ötən ilin dekabr ayında qida məhsullarının hazırlanması, saxlanması və daşınması qaydalarının pozulması, o cümlədən qida məhsullarının istehsalında gigiyenik qaydalara riayət olunmamasına görə 37 sahibkar cərimələnib, üç belə obyektin fəaliyyəti dayandırılıb, 15 nəfər müvəqqəti olaraq işindən kənarlaşdırılıb.

Mərasim evlərindən analiz üçün qəlyanaltılardan 1158 yaxma və 23 nümunə götürülüb. Laborator yoxlamalar nəticəsində 23 yaxmada çirklənmə aşkar edilib.

Bildirək ki, ötən ilin dekabrında respublika ərazisində 64 qida zəhərlənməsi baş verib. Nəticədə 113 nəfər zəhərlənib. Bundan başqa, 9 botulizmə yoluxma halı qeydə alınıb ki, bunun nəticəsində də 17 nəfər xəsarət alıb.