Qafqaz Xəbər Agentliyi ( qafqaznews.az ) olaraq dəfələrlə Dövlət Miqrasiya Xidmətində ( DMX ) baş verən qanunsuzluqlardan, əcnəbi vətəndaşlara qarşı törədilən zorakılıqdan, qurumun ölkəmizin imicinə kölgə salan fəaliyyətindən bəhs edən araşdırma yazıları dərc ermişik.

Ümumiyyətlə, ölkə mətbuatında DMX-nin fəaliyyətindəki neqativ hallarla bağlı mütəmadi məqalələr dərc olunur.

İranlı vətəndaşın zorla deportrasiya olunarkən özünü avtomobildən atması olayı bitməmiş…Çin vətəndaşının oğurlanması və s. kimi biabırçı olaylar az qala silsilə kimi bir-birini əvəz edir.

Bütün bunlar azmış kimi…DMX əməkdaşları hətta qurumla bağlı məqalələr dərc edən media mənsublarına da zor tətbiq etməkdən çəkinmirlər. Bunu Qafqaz Xəbər Agentliyi olaraq öz üzərimizdə hiss etmişik. Ancaq bizim məqsədimiz dövlətimizin hansısa qurumunu “qaralamaq” deyil, əksinə dövlətimizə başucalığı gətirən, onun imicini yüksəldən halların olmasına çalışmaqdır. Təəssüf ki, DMX-nin bəzi rəhbər şəxsləri bunun əksini edirlər. Həmin rəhbər şəxslər arasında ən çox DMX-nin şöbə müdiri Qüdrət Məmmədovun adı hallanır.

DMX-nin Baş İdarəsinin şöbə müdiri Qüdrət Məmmədovu adı daha çox özbaşınalıqda, qanunsuz fəaliyyətdə hallanır.1413518485_1413462537_0001111

Lakin şəxsi maşını ilə gecə yarısı xarici, xüsusilə türk vətəndaşların evinə basqın edən, onları oğurlayaraq, deportasiya edən Qüdrət Məmmədova “dur” deyən olmadığı üçün həmin şəxs vəzifə səlahiyyətlərini aşaraq, Türkiyə Cümhuriyyəti vətəndaşlarına qarşı qərəzli münasibətini davam etdirir. Azərbaycan I Avropa Oyunları kimi mötəbər bir yarışa hazırlaşarkən, xarici vətəndaşlar üzrə məsul bir qurumun şöbə müdirinin qanunazidd hərəkətlərini anlamaq mümkün deyil. Vaxtilə, İranla sərhəddə çalışarkən haqqında cinayət işi açılaraq, Dövlət Sərhəd Xidmətindən uzaqlaşdırılan Qüdrət Məmmədovun hansı yollarla yenidən yüksəldiyi ciddi sual doğurur.

Maraqlısı odur ki, əcnəbilər Firudin Nəbiyevin rəhbərlik etdiyi DMX-nin digər qurumlarından razılıq etdiyi halda Qüdrət Məmmədov və onun işçilərinin əməllərindən “qan ağlayırlar”.

Türkiyə Respublikasının vətəndaşları Omuş Ersun(Vöen: 1902367112) və Önen Mahmut(Vöen: 1003755362) tərəfindən Azərbaycan Prezidenti İlham Əliyevə yazılan məktub çox mətləbdən xəbər verir.

Məktubda qeyd olunur ki, hər iki şikayətçi Azərbaycan Respublikasında “SAFRAN-AZƏRBAYCAN” Məhdud Məsuliyyətli Cəmiyyətini təsis edərək,onu vergi orqanlarında qeydiyyatdan keçiriblər: “ Eyni zamanda biz ikimiz də ayrı-ayrılıqda fərdi sahibkar kimi 02.04.2015-ci ildə vergi orqanlarında qeydiyyatdan keçmişik. Şəhərin mərkəzində yerləşən kafelərdən birindən bizə inzibati-idarəetmə işləri üzrə məsləhətə böyük ehtiyacları olduğunu bildirərək təklif verildi və biz də həm öz biliklərimizi və təcrübəmizi azərbaycanlı qardaşlarımızla bölüşmək, həm də bildiyimiz kimi, apardığınız məqsədyönlü daxili və xarici siyasətin bəhrəsi olan “Bakı-2015 Birinci Avropa Oyunları” ərəfəsində çoxsaylı xarici turistlərin olacağını düşünərək, ikinci vətənimiz Azərbaycanda qonaq olacaq turistlərə ən yüksək səviyyədə xidmət göstərə bilmək üçün bu təklifi qəbul etdik. 10.04.2015-ci il tarixində fiziki şəxs Əliyev Fəxrəddin Nəsrəddin oğlu ilə podrat müqavilə əsasında ona izibati işlər üzrə məsləhət xidmətini göstərəcəyimizi öz üzərimizə götürdük. Bizim göstərəcəyimiz xidmət kafenin işçi kollektivi ilə söhbət aparmaq, onlara bu işin sirlərini öyrətmək, qonaqların qarşılanması, süfrəyə xidmətin necə təşkil olunması, müştərilərlə davranış qaydalarının öyrədilməsi və masalara nəzarət işinin təşkili formasını izah etməkdən ibarətdir”.

Şikayətçilər müraciətin davamında qeyd edirlər ki: “ 28.04.2015-ci il tarixində nahar yeməyi zamanı özünü Azərbaycan Respublikasının Dövlət Miqrasiya Xidmətinin əməkdaşları kimi təqdim edən Rəşad Abbasov və Rüfət İbrahimov adlı şəxslər bizə ayrı-ayrılıqda yaxınlaşaraq, kobud və bir dövlət məmuruna yaraşmayacaq şəkildə, “sizi deport edəcəyik” deyərək, bağırıb, hədələdilər. Biz isə etik normalara uyğun şəkildə fəaliyyətimizlə bağlı müvafiq sənədləri təqdim etdik və qanunsuz fəaliyyətlə məşğul olmadığımızı sənədlərlə göstərdik. Kafenin sahibi olan sahibkarla aramızda olan podrat müqaviləsini, Müvəqqəti Yaşamaq üçün İcazə vəsiqəmizi, eyni zamanda Türkiyə pasportlarımızın surətini və Azərbaycan Respublikasının Vergi Orqanlarında fiziki şəxs olaraq qeydiyyatdan keçdiyimiz barədə Vergi Şəhadətnaməsini DMX-nin əməkdaşlarına təqdim etdik. Lakin onlar, yüzlərlə müştərinin önündə, heç nəyə məhəl qoymadan, qollarımızı arxadan buraraq, bizə qarşı zorakılıq tətbiq etdilər. Bizi hərkəsin gözü önündə aşağılayaraq şəxsiyyətimizi alcaldıb, hansısa ağır cinayəti törətmiş qatil kimi kafenin ortasından, hər kəsin gözü önündə sürüyə-sürüyə çölə apardılar. Bizim qolumuzu arxadan buraxmayaraq, “Dodge” markalı şəxsi avtomobilə ataraq, aparmağa cəhd edərkən, oradakı azərbaycanlı vətəndaşların etirazı ilə üzləşdilər. Onlara vətəndaşlar tərəfindən bildirildi ki, bunların günahı olsa belə, şəxsi avtomobilinizlə aparmaq hüququnuz yoxdur, xidməti avtomobil çağırmalısınız. Bu haqlı etirazdan sonra Rəşad Abbasov DMX-nin Baş İdarəsinin şöbə müdiri Qüdrət Məmmədova zəng vuraraq, xidməti maşın tələb etdi. Qüdrət Məmmədovun telefonda uca səslə bağırdığı və nəinki bizim, oradakı hər kəsin eşitdiyi ifadələrini olduğu kimi təqdim edirik: “Qələt edirlər. Lazımdısa, döyə-döyə mindirin, onları maşına. Kimdilər ki, onlar sizdən nəsə tələb etsinlər. Gətirin o zibilləri idarəyə!” Rəşad Abbasov ona “baş üstə” desə də, biz həmin maşına minməkdən imtina etdik. Oradakı insanların haqlı etirazından sonra DMX əməkdaşları zor tətbiq etməkdən vaz keçdilər və 2 saatdan sonra xidməti maşın gəldi. Biz bu xidməti maşınla Ayna Sultanova heykəlinin yanında olan DMX-nin Baş İdarəsinə gətirildik. Biz ayrı otaqlara salındıqdan sonra 45-50 yaşlarında, arıq ağlı-qaralı saçları olan, xidməti formalı bir şəxs bizə yaxınlaşaraq üstümüzə qışqırıb, “Bele qudurmusunuz? Xidməti maşın tələb edirsiniz?” deyərək, hər birimizə bir ağ kağız və qələm verib yüksək səslə dedi ki, “İzahatınızı yazın! Yazın ki, biz ofisiant işləyirik”. Biz ofisiant işləmədiyimizi bildirsək də, Qüdrət Məmmədov olduğunu öyrəndiyimiz bu şəxs buna məhəl qoymadan daha uca səslə qışqırdı ki, “Yazmasanız, sizi bu dəqiqə deportasiya edəcəyəm. Haranın zir-zibili var gəlib, məni tapır! Gedin oturun xarabanızda, nə var, nəyə gəlmisiz Azərbaycana?” Nə qədər təzyiq etsə də, bizim onun diktə etdiklərini yazmadığımızı görüb, bu dəfə bizimlə yumşaq şəkildə danışmağa başladı və dedi ki, “siz izahatı yazın, onsuz da sizə heç nə etməyəcəyik, cərimə sahibkara yazılacaq. Sizdən nə gedir ki. Yazmırsınızsa, ağ kağızın aşağısına qol çəkin, biz özümüz yazarıq, lazım olan şeyləri”. Biz isə yalan ifadə yazmaqdan imtina etdik. Bu planının da baş tutmadığını görərək, bizi otaqdan qovdu”.

Sonra məktub müəllifləri qeyd edirlər ki: “ Dövlət Miqrasiya Xidmətinin əməkdaşları tərəfindən həm fiziki, həm də mənəvi hücum, eyni zamanda DMX Baş İdarəsinin şöbə müdiri Qüdrət Məmmədovun bir türk düşməni olmasına dair tarixçəsi bizi çox narahat edir. Məhz onun tərəfindən türk iş adamlarının bir çox hallarda evindən oğurlanaraq, şəxsi avtomobillə aparılması, döyülməsi, deportasiya edilməsinə dair qərarlar çıxarır, səfirliyə belə müraciət etməsinə imkan vermədiyi bildirilir. Olduqca kinli şəxs olduğu bildirilən bu şəxsin bizi təqib etdirdiyinə dair də məlumatlar almışıq. Qısacası, Qüdrət Məmmədovu tanıyan şəxslər onun bizdən gec-tez ağır intiqam alacağını bildirirlər. Hətta bildirirlər ki, o, bizim Müvəqqəti Yaşama İcazəmizi ləğv etdirə və Azərbaycandan qısamüddətli səfər etdiyimiz zaman ölkəyə buraxdırmaya bilər. Açıqcası, biz bütün sənədlərimiz qaydasında olmasına rəğmən Qüdrət Məmmədov qorxusu altında yaşayırıq”.

Dövlət Miqrasiya Xidmətinin digər qurumlarının fəaliyyətini qənaətbəxş hesab edən Omuş Ersun və Önen Mahmut yazır ki: “ Biz Firudin Nəbiyevin rəhbərlik etdiyi Azərbaycan Respublikasının Dövlət Miqrasiya Xidmətindən hər zaman razı olmuşuq, hər zaman sənədləşmə ilə bağlı istər sərhəddə, istərsə də digər müvafiq yerlərdə DMX əməkdaşları hər zaman bizi gülər üzlə qarşılayıblar, sənədlərimizin qəbulunda bizə kömək ediblər.Lakin Qüdrət Məmmədovun neqativ fəaliyyəti və onun tabeliyində olanların kobud davranışları ilk növbədə cənab Firudin Nəbiyevə qarşı bir təxribatdır. Təəssüf ki, Qüdrət Məmmədov birilərindən dəstək almasa, Azərbaycan xanımları ilə evli olduğu halda bir çox Türkiyə vətəndaşını qanunsuz olaraq, deportasiya etməz, Stalin dönəmi repressiyası zamanında olduğu kimi gecə vaxtı Türkiyə vətəndaşlarını yatağından oğurlamaz, mobil telefonlarını əllərindən alaraq, özlərini deportasiya etməzdi”.

Redaksiyadan: Göründüyü kimi ortada ciddi şikayət faktı var və bu barədə Azərbaycan Prezidenti ilə yanaşı Azərbaycan Respublikasının Birinci Xanımı, millət vəkili Mehriban Əliyeva, Azərbaycan Prezident Adminstrasiyasının rəhbəri Ramiz Mehdiyev, Azərbaycan Respublikasının Dövlət Miqrasiya Xidmətinin rəisi Firudin Nəbiyev, Azərbaycan Respublikasının İqtisadiyyat və Sənaye naziri Şahin Mustafayev, Azərbaycan Respublikası İnsan Hüquqları üzrə müvəkkili, Ombudsman Elmira Süleymanova ilə yanaşı Türkiyə Respublikasının Azərbaycandakı səfiri Alper Coşqun da məlumatlandırılıb.

Güman edirik ki, müvafiq qurumlar bu məmur özbaşınalığının qarşısının alınması üçün ciddi addım atacaqlar.

Mövzunu diqqətdə saxlayacağıq.