İş adamı Mürvət Həsənli vəkil Aslan İsmayılovun həbs olunması üçün məhkəməyə müraciət edib.

Mediatv.az-ın “Qafqazinfo”-ya istinadən  verdiyi xəbərə görə, M.Həsənli Səbail rayon məhkəməsinə müraciət edərək A.İsmayılovun Cinayət Məcəlləsinin 147-ci (böhtan) maddəsi üzrə cinayət məsuliyyətinə cəlb edilməsi üçün xüsusi ittiham qaydasında şikayət verib.
M.Həsənli vəkilin bir müddət öncə mətbuata açıqlamasında onu MTN-nin adamı kimi qələmə verməsini böhtan adlandırıb.

Səbail rayon məhkəməsi şikayəti icraata götürməkdən imtina edib. İş adamı qərardan apellyasiya şikayəti verib. Şikayət üzrə məhkəmə prosesi iyulun 11-də Bakı Apellyasiya Məhkəməsinin hakimi Əmir Bayramovun sədrliyi ilə davam etdiriləcək.

Qeyd edək ki, Həsənli və İsmayılovun daha bir çəkişməsi var. A.İsmayılov Türkiyədən Azərbaycana damazlıq yumurta idxal edən “Emre Piliç” şirkətinin vəkilidir. O, vaxtilə həmin şirkətlə əməkdaşlıq edən iş adamı Mürvət Həsənlini “Emre Piliç”ə olan borcunu qaytarmamaq ittiham edir.