İrəvanda şou bitdi və adi günlər başladı. Bir neçə gün ərzində dollar və digər xarici valyutalar əhəmiyyətli dərəcədə bahalaşdı. Ermənistan parlamentinin deputatı Mikael Melkumyanın sözlərinə görə, bu il dramın möhkəmlənməsi üçün şərtlər yoxdur. 

Deputatın sözlərinə görə, aprelin 24-də çox sayda qonağın gəlməsi ilə bağlı olaraq milli valyutanın dəyərindəki gözlənilən artım özünü doğrultmadı. "Dramın möhkəmlənməsini ancaq ölkədə iqtisadiyyatın güclənməsi zamanı gözləmək olar. Bu isə tezliklə olmayacaq". 

Milli valyutanın gələcəyi ilə bağlı daha fəlakətli qiymətləndirməni isə iqtisadçı Vaaqn Xaçatryan səsləndirib. "Dram dəyərsizləşməyə davam edəcək. Bu isə yaxın zamanda Ermənistanda böyük infilyasiyaya səbəb olacaq. 

Milli valyuta möhkəmlənə bilməz. Bunun üçün sadəcə olaraq əsas yoxdur. Böyük valyuta axını, sərmayələr, ixracın artımı olmalıdır. Bütün bunlardan isə bizdə yoxdur. İşlər get-gedə pisləşir".