WADA ağırlıqqaldırmanın ardınca güləş idman növü ilə bağlı da sərt cəzalar verməyə başlayıb.

Mediatv.az-ın Apasport.az saytına istinadən məlumatına görə, artıq bu növ üzrə 2 Olimpiya mükafatçısı medalından məhrum edilib.

Bunlar Pekin-2008-in çempionu özbəkistanlı Aytur Taymazov və London-2012-nin gümüş mükafatçısı rusiyalı Besik Kuduxovdu. Bu sərbəst güləşçilərin dopinq-testlərinin təkrar yoxlanılması müsbət nəticə verib.

Artıq xarici saytlar medalların yeni sahiblərinin də adlarını açıqlayıblar. Rusiyalı Bəxtiyar Əhmədov Pekin-2008-in “qızıl”ına, slovakiyalı Devid Musulbes isə “gümüş”ə yiyələnib. Kubalı Disney Rodriges 5-ci yeri 3-cü pilləyə dəyişib.

Finalda azərbaycanlı Toğrul Əsgərova uduzan Kuduxovun gümüş medalı isə Yoqeşvar Datta (Hindistan) nəsib olub. 27 yaşında avtomobil qəzasında dünyasını dəyişən rusiyalı güləşçinin cəzalanması KXDR idmançısı Li Çjon-Menin “bürünc”ə sahib çıxması ilə nəticələnib.

“flowrestling.org” saytının iddiasına görə, cəzalar bununla bitməyəcək. Dopinqdə “ilişənlərin” siyahısında Qazaxıstan, Azərbaycan və Ukraynalı pəhləvanların da olacağı vurğulanır.

Azərbaycan Güləş Federasiyasından isə bildirilir ki, güləşçilərimizin medallarının geri alınması ilə bağlı Beynəlxalq Dopinq Komitəsindən federasiyaya hər hansı rəsmi məlumat daxil olmayıb: “Ona görə də hansısa saytda çıxmış bir xəbərə şərh vermək düzgün olmaz”.