Albaniya yığmasının İrəvanda Ermənistanı məğlub edərək (3:0) tarixində ilk dəfə Avropa çempionatının final mərhələsinə vəsiqə qazanması ilə bağlı şok iddia ortaya atılıb.

Mediatv.az saytının xəbərinə görə, Serbiya və Albaniya mətbuatında albanların Ermənistanla oyunu satın aldığı deyilir:

“Ermənistanın qapıçısı və üç müdafiəçisinin 500 min avro rüşvət aldığı bildirilir. Qrupda heç bir iddiası qalmayan Ermənistan yığmasının bu oyunu satdığı inandırıcı görünür. Erməni müdafiəçinin öz qapısına vurduğu qol və qapıçının böyük səhvi danışılmış oyun iddialarını gücləndirir”.

Matçın başlamasına az qalmış dünyanın bukmeker kontorlarında Albaniyanın qələbəsinə qoyulan əmsallar sürətlə düşdüyü halda, Ermənistanın məğlub olacağına “inam” çoxalıb.

Bütün bunlardan sonra isə İ qrupunda Albaniyanın xal itirməsini gözləyən Danimarka pley-offda oynamaq məcburiyyətində qalıb. Danimarka mətbuatı satılmış oyun iddiasını ciddi şəkildə araşdırmağa başlayıb.(apasport.az)