"Neftçi"də növbəti baş məşqçi dəyişikliyi gözlənilir

Avrofutbol.com-un əldə etdiyi məlumata görə, Sadıq Sadıqovun prezidenti olduğu kluba yiyələnmək istəyən Dövlət Neft Şirkətinin vitse-prezidenti Elşad Nəsirov və AFFA baş katibi Elxan Məmmədov cütlüyü İqor Ponomaryovu "Neftçi"yə baş məşqçi gətirir. 

Artıq çütlük məşhur penalti ustası kimi tanınan Ponomaryovu İsveçdən Bakıya gətirib. 

Məlumata görə, III dövrənin əvvəlində "Neftçi" Arif Əsədovu yola salıb, Ponormaryovla müqavilə imzalayacaq. 

Yeri gəlmişkən Ponormaryovun Elşad Nəsirovla yaxın dostluq münasibətlərinin olduğu da bizə çatan məlumatlar sırasındadır.

Qeyd edək ki, AFFA prezidenti Rövnəq Abdullayevin yaxın qohumu Sadıq Sadıqovun rəhbərlik etdiyi klubda hazırda əsas söz sahibi Elxan Məmmədovun kadrı kimi tanınan Elnur Məmmədovdur. Tahir Süleymanovun vitse-prezident vəzifəsindən uzaqlaşdırılmasından sonra onun yerinə gətirilən Elnur Məmmədov Sadıq Sadıqovun adamlarını tam neytrallaşdıra bilib. Hətta Elnur Məmmədov klub prezidentinin oğlanları ilə münaqişəyə girməkdən çəkinməyib. 

Turnir cədvəlində "Qarabağ" və "İnter"dən sonra III pillədə qərarlaşan "Neftçi"də maliyyə cəhətdən də vəziyyət ürəkaçan deyil. Futbolçuların maaşlarının aylarla gecikdirildiyi deyilir.