Novruz bayramında əfv olunacağı barədə məlumatlar təsdiqini tapır

Bir sıra hüquq müdafiəçiləri də israrla bildirirlər ki, ölkə başçısı İlham Əliyev Novruz bayramı ərəfəsində əfv imzalayacaq.

“Azadlıq”a daxil olan məlumatlarda isə qeyd edilir ki, bu əfv digərlərindən fərqlənməyəcək. Yəni, siyasi məhbusların böyük bir hissəsi yenə də həbsxanada qalacaq. Məlumatlarda həmçinin qeyd edilir ki, sabiq deputat Gülər Əhmədova əfv oluna bilər. 

Gülər Əhmədova “mandat alveri”nə görə həbs edilib. Onun həbsi fəaliyyəti dayandırılmış Azərbaycan Beynəlxalq Universitetinin rektoru Elşad Abdullayevin  “mandat alveri” ilə bağlı yaydığı videogörüntülərdən sonra reallaşıb. Lakin Gülər Əhmədova bu görüntülərin saxta olduğunu iddia edir. Digər tərəfdən məlumatlara görə, hakimiyyətlə sabiq deputat arasında anlaşma olub. 

Həmin anlaşmaya görə Gülər Əhmədova qısa müddətdə azadlığa qovuşmasının müqabilində iqtidara yönəlik heç bir açıqlama verməməlidir. İlk vaxtlarda “ağzımı açdırmayın” bəyanatı verən Gülər Əhmədovanın sonradan susması bu anlaşma ilə izah edilir.