Mediatv.az xəbər verir ki, bu sözləri Azərbaycan Müdafiə Nazirliyi Mətbuat Xidmətinin keçmiş rəisi, ehtiyatda olan polkovnik Eldar Sabiroğlu Moderator.az-ın “Cəbhədə son döyüşlər haqqında nədənsə sizin səsinizi eşidə bilmədik. Halbuki 7 il MN-nin mətbuat xidmətinin rəisi vəzifəsini daşımısınız. Niyə danışmaq istəmirsiniz?” sualını cavablandırarkən deyib.
Eldar Sabiroğlu daha sonra son insident zamanı Müdafiə Nazirliyinin mətbuat xidmətinin itkilərimizlə bağlı gec məlumat verməsinə də münasibət bildirib:
“MN-də xidmət etdiyim dövrdə təmas xəttində baş verən bu və ya digər insidentlə əlaqədar indi informasiya ehtiyatlılığının tərəfdarları kimi çıxış edənlər cəmi üç il öncə mənim yaxamı üzürdülər ki, niyə susursan, niyə saatda bir məlumat yaymırsan. Hətta vaxtilə Müdafiə Nazirliyinin əleyhinə təşkil olunmuş mitinqlərdə bu adamlardan bəziləri fəalcasına iştirak da edirdilər. İndi televiziyalarda, sosial şəbəkələrdə onları izləyərkən mənə çox qəribə görünür.
Bəli, qütbləşmə qəbul edilməzdr. Ordunu müdafiə etmək, onun ictimai nüfuzunu yüksəltmək hər birimizin borcudur və bunu bir an belə yaddan çıxarmaq olmaz. Ancaq eyni zamanda o fikirdə də deyiləm ki, müəyyən həddləri gözləməklə hər hansı informasiya genişliyi Silahlı Qüvvələrimizin adına xələl gətirmiş olsun.
Bəs bu hörmət gətirirmi ki, şəhidlərimizi düşmən 6 saat sonra adbaad sosial mediaya çıxardığı halda biz gözləməyi seçdik və onlardan 2 sutka sonra şəhidlərimizin adlarını açıqladıq. Vaxtında bunu etmiş olsa idik nə baş verərdi ?! Məncə nə dünya dağılar, nə də bununla bağlı MN-ni kimsə hədəf götürə bilməzdi. Bu haqslızıq olardı. Mətbuat xidmətində suç axtarmayaq. Xidməti yönləndirən çarpazlı həlqənin dərkinə görə guya “tələskənlik” ictimai çaşqınlığa fürsət verə bilərdi. Bu düşüncə ilə qətiyyən barışmaq olmaz. Savaşda canlı itkiyə yol verilməsi təbiidir. Necə ola bilər ki, gərgin döyüşlər gedir, amma itki verməyəsən. Torpağı şəhidsiz qorumaq və geri qaytarmaq mümkün deyil.
Nə isə, bəzi məsələlər və suallar da vardır ki, üzərindən keçməyi lazım bilirəm.
Ordu elə bir sturukturdur ki, burada hər şeyi süfrə başına gətirmək olmaz. Lakin eyni zamanda elə məsələlər də vardır ki, onların deyilməsi ilə tufan qopmaz. Baxın görün, son döyüşlərlə baglı ekspertlərin və bəzi yüksək zabitlərin özlərinin bir-birini möhkəm döyən ziddiyyətli açıqlamaları ilə tanış olduq. Bu niyə belə olmalıdır ki?”
