Qafqaz Müsəlmanları idarəsindən verilən məlumata görə, Yaxın Şərqdə, xüsusilə Suriyada baş verən hadisələr, o cümlədən Səudiyyə Ərəbistanının əməliyyatlarda iştirakını nəzərə alan Krallıq ziyarət zamanı mümkün terror təhlükəsindən ehtiyat üçün təhlükəsizlik tədbirlərini gücləndirməyi planlaşdırır.

Mediatv.az xəbər verir ki, bundan irəli gələrək müvafiq ölkələrdən gələcək zəvvarlara mümkün qədər toplaşaraq gəzməmək, şübhəli əşya, şəxs və əlamətlər gördükdə dərhal yaxınlıqdakı təhlükəsizlik patrulunu məlumatlandırmaq xəbərdarlığı edilir.

Zəvvarlara xüsusuilə ziyarət qrafikindən kənarlaşmamaq tövsiyə olunur.

Qeyd edək ki, aprelin 1-dən Azərbaycanda Həcc ziyarətinə sənəd qəbulu başlayıb. Bu il Azərbaycandan gedəcək zəvvarlar üçün say limiti ötən ilkindən az - 1500 nəfər müəyyənləşib. Ziyarət zamanı daha yaxşı şəraitli hotellərdə qalmaq, bahalı yeməklərlə təmin olunmaq, o cümlədən hotellərdə 4 nəfərlik otaqlarda yerləşmək 4500 dollar, nisbətən ucuz şəraitli, 6 nəfərlik otaqlarda qalmaq isə 3500 dollardır. Dolların kursuna görə bu ilki ziyarət xərcləri ötən il ilə müqayisədə bahadır. 

Ötən il Azərbaycandan Həcc ziyarətinə 2400 zəvvar gedib, onlardan 3-ü Məkkədə dünyasını dəyişib və orada dəfn olunub.

Ötən il həm də Həcc ziyarəti kütləvi insan ölümü ilə nəticələnən hadisələrin baş verməsi ilə də yadda qalıb. Azərbaycanda Həcc ziyarətinə sənəd qəbulunu yalnız QMİ aparır.

APA