Dünyanın bir çox ölkəsində güclü agentura şəbəkəsi yaradan ABŞ-ın Mərkəzi Kəşfiyyat İdarəsi (MKİ – ingiliscə CİA) beynəlxalq siyasətdə aparıcı rola malikdir.
Mediatv.az:  Heç təsadüfü deyil ki, dünya güclərinin qlobal arenadakı perspektiv siyasəti həm də kəşfiyyatların hesabatlarına əsaslanır.
Bu mənada ABŞ-ın sözügedən kəşfiyyat idarəsi özünəməxsus çəkiyə və rola malikdir.
Maraqlıdır ki, dünyanın hər yerinə şaxələnən MKİ öz saytında xarici dövlətlərin hökumətini təmsil edən şəxslərin də adını yerləşdirib. Modern.az xəbər verir ki, MKİ-nin rəsmi saytında “Xarici ölkələrin dövlət başçıları və hökumət üzvləri” adlı bölməsində Azərbaycanın ali elitasındakı şəxslərin də adları var.
MKİ-nin məlumatına görə, həftəlik olaraq hökumət üzvlərinin siyahısı yerləşdirilən kataloqlar onlayn rejimdə yenilənir.
Bu siyahı isə informasiya almaq üçün ilkin yardım kimi nəzərdə tutulub.
MKİ-nin saytındakı Azərbaycana aid siyahıda hələlik Dövlət Təhlükəsizlik Xidmətinin (DTX) rəisi və rabitə və yüksək texnologiyalar naziri vəzifələri boş göstərilib.
Qeyd edək ki, ləğv olunmuş Milli Təhlükəsizlik Nazirliyinin bazası əsasında yaradılan DTX-nın rəisi Mədət Quliyevdir. Əli Abbasov isə prezident İlham Əliyevin sərəncamı ilə rabitə və yüksək texnologiyalar naziri vəzifəsindən azad olunduqdan sonra onun yerinə Ramin Quluzadə təyin edilib.