Mediatv.az xəbər verir ki, söküntü işlərinin pərakəndə aparılması ərazini xarabalığa çevirib. Şəhər istiqamətinə gedən yollar yararsız vəziyyətə düşüb, bəzi yollar isə bağlanıb. Burada yaşayanlar sanki blokada şəraitində yaşayır. Hər tərəfə söküntü qalıqları səpələnib. Ötən ildən başlayan söküntü işləri yarımçıq qalıb. Bu isə hazırda orada yaşayan sakinləri cana yığıb. Ətraf çirkab və gəmirici həşəratların məskəninə çevrilib.

Musavat.com-un əməkdaşı adıçəkilən əraziyə baş çəkərək, sakinlərin problemlərini işıqlandırmağa çalışıb.

Ötən il Qaqçqın və Məcburi Köçkünlərin İşləri üzrə Dövlət Komitəsi məcburi köçkün ailələrini yeni mənzillərlə təmin edib. Hazırda ərazidə qalanlar isə yerli əhalidir. Ümumilikdə, burada 40-a yaxın ailə yaşayır ki, onlar da heç bir kompensasiya verilmədən evlərinin söküləcəyi təhdidi ilə üz-üzədirlər.

Yasamal Rayon İcra Hakimiyyəti tərəfindən həmin ailələrə evlərini tərk etmələri barədə xəbərdarlıq edilsə də, qəsəbə sakinləri müəyyən kompensasiya və ya mənzillə təmin olunmayacaqları halda evlərini tərk etməyəcəklərini bildiriblər.

Hazırda ərazidə yaşayışı davam etdirən ailələr deyirlər ki, 2 ay öncə Yasamal rayon icra başçısının qəbulunda olublar: “Köçürülmə prosesi başlayanda tez-tez icra nümayəndələri evlərə gələrək tərk etməyimizi tələb edirdilər. Bildirirdilər ki, evləriniz hamısı qeyr-qanuni tikilib. Guya ki, heç bir sənəd olmadan torpağı müsadirə etmişik. 20 ildən çoxdur ki, bu ərazidə yaşayırıq. Bu günə qədər heç kim “niyə qanusuz tikmisiz” demədi. Özləri də yaxşı bilir ki, bu ərazidə ev tikmək üçün 3-5 min manat rüşvət verməlisən. Bu ətrafda daim “məzənnə” belə olub. Bütün evlərdən “haqq” alınıb və heç kim özbaşına tikinti apara bilməyib. Daşı-daş üstündə qoyan kimi “JEK” rəisi başımızın üstünü kəsirdi. Köçürülmə başlayan kimi qanundan, məhkəmədən danışırlar.

Bir neçə ailənin evini xəbərdarlıq etmədən sökdülər. Lakin yenidən taxtadan otaq bərpa edərək yaşamağa davam etdilər. Ədalətsizliklə bağlı dəfələrlə Yasamal Rayon İcra Hakimiyyətində olmuşuq, lakin bizi yola veriblər. Sözümüzü deməyə imkan verilməyib. Sonucu dəfə 2 ay öncə icra hakiminin qəbulunda olduq və bizə bildirildi ki, əgər ailələr öz xoşu ilə köçməsələr iş məhkəmə yolu ilə aparılacaq və qanunsuz tikililər söküləcək. Bir sözlə, icra hakimi evlərimizi başımıza uçurub, bizi isə küçəyə atmaq niyyətindədir”.

Qarşı tərəfin də mövqeyini dərc etməyə hazırıq.