Bunu anspress-ə açıqlamasında Rabitə və Yüksək Texnologiyalar NazirliyininTənzimləmə şöbəsinin müdiri Əlyar Təmirov bildirib.

Onun sözlərinə görə, mobil operator abunəçiləri xidmətlə bağlı yaranan problemlərə görə operatorun özünə, tənzimləyici orqan olaraq Rabitə və Yüksək Texnologiyalar Nazirliyinə müraciət edə bilərlər. "Bundan başqa əgər abunəçilər hüquqlarının pozulduğunu düşünürlərsə, onların tam hüququ var ki, mülki qaydada məhkəməyə müraciət etsinlər", - Əlyar Təmirov əlavə edib.

Son vaxtlar mobil telefon istifadəçiləri xidmətlərlə bağlı bir çox problemlərlə üzləşdiklərini deyirlər. Vətəndaşların əsas şikayətləri hər hansı bir xidmətə qoşulmadıqları halda onların balansından müəyyən məbləğin çıxarılması ilə bağlıdır. Eyni zaman abunəçilər bildirirlər ki, hər hansı operatora zəng edən zaman qarşı tərəf cavab vermədiyi halda telefon avtomatik olaraq operatora qoşulur və balansdan 5-7 qəpik məbləğində pul çıxılır. Bu hal həm şəbəkədaxili, həm də şəbəkəxarici zənglərdə müşahidə edilir. 

Şikayətçilərin əksəriyyəti problemin hər 3 mobil operatorda müşahidə olunduğunu, amma bir mobil operatorda daha tez-tez rast gəlindiyini iddia edirlər. Onların sözlərinə görə, istənilən mobil operator abunəçiləri digər operatorun müştərisinə zəng edərkən bu halla qarşılaşırlar və danışmadıqları halda onların balansından müəyyən məbləğ çıxılır.

Lakin mobil operatorlar müştərinin razılığı olmadan onların hər hansı xidmətə qoşulmasının qeyri-mümkün olduğunu bildirirlər.

Hazırda fəaliyyət göstərən mobil operatorlardan anspress-ə verilən açıqlamada deyilir ki, müştərinin razılığı olmadan o, heç bir xidmətə qoşula bilməz. "Abunəçi xidmət haqqında mesaja cavab verməklə, yaxud da onlara təqdim olunan hər hansı başqa yolla xidmətə qoşula bilər."

Bununla belə, onlar bəzən abunəçilərin balansından məbləğin çıxılması hallarının olduğunu da istisna etmədilər. "Bu cür hallar texniki problemlərlə bağlı yarana bilər. Ona görə müştəri belə hallarla rastlaşanda şirkətə xəbərdarlıq etməlidir ki, bu problemlər aradan qaldırılsın", - deyə mobil operator nümayəndəsi əlavə edib.

Bu səbəbdən Rabitə və Yüksək Texnologiyalar nazirliyi vətəndaşları daha diqqətli olmağa və bu cür hallarla qarşılaşdıqları zaman quruma müraciət etməyə çağırır. Abunəçilər xüsusilə reklam mesajları gələn zaman ehtiyatlı olmalıdırlar. Hər hansı xidmətdən istifadə zamanı hüquqları pozularsa, nazirliyə və eyni zamanda məhkəməyə müraciət edə bilərlər.