Əmək və Əhalinin Sosial Müdafiəsi Nazirliyi (ƏƏSMN) Aparatının Daxili nəzarət şöbəsi tərəfindən Bakının Xətai rayon Məşğulluq Mərkəzinin və Şabran rayon Əhalinin sosial müdafiəsi mərkəzinin 2010-2013-cü illər ərzindəki fəaliyyətinin araşdırılması zamanı bir sıra qanun pozuntularına yol verildiyi aşkar edilib.

Nazirlikdən Mediatv.az-a verilən məlumata görə, ƏƏSMN yanında Dövlət Məşğulluq Xidmətinin Xətai rayon Məşğulluq Mərkəzinin əməkdaşlarının funksional vəzifələrinin icrası vəziyyətinin araşdırılması nəticəsində işsizlik müavinətlərinin təyinatı zamanı 88 halda qanunsuz olaraq 1 milyon 37 min 852,95 manat məbləğində dövlət vəsaitinin ödənildiyi müəyyən olunub. Habelə  Şabran rayon Əhalinin sosial müdafiəsi mərkəzində aparılan araşdırmalar nəticəsində mərkəz tərəfindən 32 sosial müavinət işi üzrə 50 min 881,8 manat və 36 ədəd ünvanlı sosial yardım işi üzrə 43 min 5,1 manat, ümumilikdə 93 min 886,9 manat (bundan 44 min 642 manatının araşdırma dövründə büdcəyə bərpası təmin olunub) artıq ödəmənin aparıldığı aşkar edilib.

Hər iki hal üzrə müvafiq vəzifəli şəxslər ilkin olaraq tutduqları vəzifədən azad olunmaqla, araşdırmaların nəticələrinə dair müvafiq materiallar hüquqi qiymət verilməsi üçün ƏƏSMN tərəfindən Azərbaycan Respublikasının Baş Prokurorluğuna təqdim edilib.